Bancaja entra n'Asturies

La entidá financiera valenciana Bancaja cuenta con entrar nel mercáu asturianu nos prósimos meses. Asina dixo la caxa d'aforros valenciana al dar anuncia del so proyectu d'espardimientu. El casu ye que'l conseyu d'alministración de Bancaja ta acabante d'aprebar la creación de 31 oficines, de les cuales una va asitiase n'Asturies. Ye raro qu'una entidá financiera incluya'l mercáu asturianu porque amás de ser un mercáu pequeñu tien una competencia mui alta pola fuerte presencia de Caxastur y Banco Herrero. La preba d'ello ye que mentanto en zones como Galicia o Castiella bancos y caxes tan abriendo bien sucursales, Asturies nun entra nos planes de les más de les entidaes financieres.


Bancaja ye la caxa d'aforros de Valencia, Castellón y Alicante. Esta caxa tien más de dos millones de clientes y ye la cuarta caxa d'aforros del Estáu. L'activu más importante que tien ye la propiedá del Banco de Valencia, ún de los más atractivos pola importante presencia que tien nes comunidaes del Mediterráneu y pola so rentabilidá.