Banca y empresarios saluden a Zapatero

Anque l'actualidá n'Oriente Mediu nun tranquiliza a naide y l'amenaza terrorista islámica sigue más viva que nunca, la selmana pasada hebo un pequeñu rebote técnicu nos mercaos bursátiles. Partiendo d'unos mínimos, les bolses garraron fuelgu y aparcaron les duldes económiques y xeopolítiques. Los valores baratos tiraron pel mercáu.

Ente les estadístiques de la selmana pasada destaca'l mal datu del IFO alemán de confianza empresarial, con 95,4 puntos cuando los analistes contaben con 95,7. Ye la estadísitica más baxa nos últimos cinco meses n'Alemaña, colo que les esperances de recuperanza económica nun medren. El xorrecimientu del PIB del Reinu Xuníu foi d'un probetayu 0,9%, pero dientro de les previsiones. Al otru llau del Atlánticu, l'índiz de confianza de la Universidá de Michigan algamó los 95,8 puntos, meyor de lo esperao.

La tensión xeopolítica dempués de los atentaos de Madrid y agora col asesinatu d'Estáu del xeque d'Hamás tien nerviosa a la comunidá inversora. La estabilidá mundial nun lleva bona traza y eso conozse nes bolses. Les europees tan febles, anque la selmana pasada foron de menos a más. París, Francfort y Milán tuvieron un pieslle en positivo'l vienres pasáu mentanto que Llondres nun pudo superar les perdes. En xeneral les bolses britániques y alemanes yá lleven trés selmanes en perda. Fuera del Vieyu Continente, Wall Street tuvo otra selmana de blincos. L'índiz Dow Jones tuvo'l vienres una cayida del 0,06% hasta los 10.212,97 puntos, y el tecnolóxicu índiz Nasdaq perdió'l 0,36% hasta los 1.960,02 puntos.

L'Ibex-35 tuvo un pieslle en positivo dempués de dos selmanes en perda. Esti índiz tuvo un pieslle raspiando los 8.000 puntos, exactamente 7.952,8 lo que supón una xuba nel conxuntu la selmana del 0,9%. El volume de negociu del vienres foi bien curiosu: 2.840 millones d'euros. Ente les mayores xubes tuvieron Zeltia, Arcelor, Ferrovial, Enagás y Bankinter. Nel terrén de les perdes destacaron Amadeus, NH Hoteles, Inditex, Iberia y Mapfre.

La selmana quedó marcada pola riestra de sofitos empresariales al nuevu gobiernu de Zapatero. Botín, Francisco González (BBVA) y tolos cabezaleros de les empreses privatizaes puestos pol PP tan faciendo una anuncia de sofitu y llealtá al nuevu gobiernu socialista. Anque José Luís Rodríguez Zapatero aseguró que nun va intervenir nes grandes empreses privatizaes, los cabezaleros socialistes ya tan preparando la llimpieza de puestos y persones neses empreses, según fontes de dellos confidenciales d'Internet.

Nel mercáu de materies primes, el petróleu sigue penriba los 30 dólares el barril. La gran demanda de crudu poles importaciones chines nun garantiza la estabilidá del mercáu nel segundu semestre d'esti añu, y la OPEP tampoco nun tien munchu interés en pone-y tope al preciu na banda de los 25-27 dólares. El vienres pasáu'l barril Brent cotizaba a 31,5 dólares. Otramiente, l'oru tuvo una xuba del 1% la selmana pasada hasta los 420 dólares. La inestabilidá ta llevando a los inversores a invertir nesti metal mariello, refugu del mieu y de la prudencia.


El mercáu de renta fixo tuvo un pieslle en negativo. El bonu de referencia, el bund alemán, tuvo una perda de rentabilidá hasta el 3,84%. Dende Alemaña yá tan presionando Gobiernu y economistes pa que'l BCE entame un nuevu periodu de baxaes nos tipos d'interés. Les febles economíes de Francia y Alemaña son el meyor xustificante pa qu'esti bancu central baxe los tipos enantes del veranu