Balonmanu: Asturies-Portugal el 30 d'avientu

El Director xeneral de Deportes del Principáu, Daniel Gutiérrez Granda, y l'alcalde d'Avilés presentaron esta mañana en rueda de prensa'l partíu que va xugar la selección asturiana absoluta de balonmanu contra la de Portugal. L'alcuentru va xugase a les 8 de la tarde'l 30 d'avientu n'Avilés en polideportivu d'El Quirinal, y el preciu de les entraes va ser de dos euros pa rapacinos y cinco p'adultos.

Nel separtáu deportivu, la selección asturiana va dirixila Falo menéndez, que tien un bayurosu currículum nel qu'inclúi participaciones nel equipu técnicu dela selección Española. Alberto Suárez va ser el segundu entrenador d'un equipu en que se cuenta cola presencia de la estrella asturiana del Barcelona, Entrerríos. Pela parte portuguesa selección que ta ente les 15, primeres del mundu, tamién hai un asturianu, l'entrenador Javier García Cuesta, que foi xugador col antiguu equipu de balonmanu del Sporting y col del Atlético de Madrid y que lleva dende 1979 entrenando a equipos de balonmanu del meyor nivel, incluyendo les selecciones nacionales de los EEUU, Exiptu, españa y, dende 1.999, Portugal.

A falta de fútbol, especialidá que Deportes descartó esti añu por problemes presupuestarios, el balonmanu va ser la especialidá estrella que xuegue esti añu una selección asturiana absoluta. L'anterior partíu de la selección absoluta asturiana de balonmanu foi va dos años, cuando Asturies y Brasil xugaron en polideportivu de La Guía - Xixón, imaxe qu'acompaña a esta noticia.