Balmonte yá procesa l'oru de Groenlandia

Depués de seyes años d'esplotación a cielu abierto, la empresa de capital canadiense Río Narcea Gold Mines entamó nesti 2.004 una llinia d'esplotación nueva que pue facer un dañu enforma grave nel mediu ambiente.

Nel momentu en que la mina n'abertal ta escosando les sos reserves, la empresa Río Narcea Gold Mines entama una esplotación baxo tierra y amás quier saca-y tol rindimientu a la planta de tratamientu de mineral de Boinás procesando'l mineral en bruto d'otres mines del mundu. Como adelantáremos yá n'Asturies.com en setiembre, Río Narcea va procesar esti añu mineral de la mina d'oru que Crew Development tien en Nalunaq (Groenlandia). La planta d'El Valle recibió yá'l primer de los cuatro cargamentos de 30.900 tonelaes que van entrar esti añu a procesase en Balmonte, onde ye fácil que la empresa tenga que construyir otra balsa de cianuru, n'escosando los dos años de vida útil que-y queden a la que yá esiste, pa ser a procesar esti volume de producción. Con ser grave, la presencia de les balses de velenu, que puen causar una desgracia como la de Boliden n'Andalucía, nun son l'amenaza más inmediata pal mediu ambiente, y ye que pa carretar les más de 30.000 tonelaes de tierra de Groenlandia que vinieron en barcu hasta Avilés van precisase más de 1,200 viaxes de camión, cantidá qu'hai que multiplicar por cuatro o cinco barcos que puen venir esti añu hasta completar les 160.000 tonelaes de carga apautaes.

Río Narcea cuenta con procesar esti añu, ente'l mineral propio y lo de Nalunaq, un total de 200.000 onces d'oru, que salen d'Asturies per avión pa los mercaos internacionales. L'añu 2.003, la empresa procesó un total de 177,225 onces y repartió un beneficiu de más de 9 millones de dólares