Balance tres d'un añu del Prestige

Col cabudañu del desastre del Prestige, toles alministraciones y entidaes faen balance de lo que foi la traxedia mediuambiental. Mientres los análisis del Ministeriu de Fomentu sorrayen la eficacia del llabor de llimpieza de les playes y a defender la xestión de la situación y la decisión de meter el barcu más pa la mar, los colectivos ecoloxistes concueyen nuna crítica unánime al llabor de les autoridaes.

Ente estos colectivos ta la Coordinadora Ecoloxista d'Asturies, qu'afirma que "la tendencia de les autoridaes a minimizar el problema roza col trunfalismu", quitándo-yos validez a les cifres de fomentu que falen d'ocho playes afectaes anguaño pol galipote. En concreto, y estudiando'l casu asturianu, los ecoloxistes dicen que delles playes n'Asturies precisen entovía de más atención, sobremanera nel ária supramareal y la parte alta del intermareal, siendo entovia más complicada la situación de los pedreros, onde'l galipote acabó caltriando pente les piedres. Ente les playes más dañaes a día de güei, la Coordinadora da les d' El Gallu en Gozón, Carranques y El Tranqueru en Carreño, La Ñora en Xixón, Playa España y Merón en Villaviciosa, Llastres en Colunga y Beciella y Morís en Caravia.

D'otra manera, la Coordinadora denuncia playes que nun precisen de llimpieza, pero que tienen un ganchu turísticu grande siguen recibiendo equipos de xente cásique tolos díes, siendo ente estos los casos más escandalosos los de Salinas en Castrillón, San Llorienzo, Nataoyo y Arbeyal en Xixón, Xivares en Carreño o Rodiles en Villaviciosa. En cuantes a la calidá del llabor de llimpieza, la Coordinadora denuncia que'l protocolu que preparó'l Principáu a raíz de la crisis nun ta cumpliéndose. Tocantes al analís de los efectos, los ecoloxistes afirmen que n'Asturies nun se fizo un estudiu sobre'l dañu del galipote a los fondos marinos