Balance de les xornaes de llingua nes escueles

Recién finaron les IX Xornaes de la Llingua y Cultura Asturiana, entamaes polos colexos públicos de la fastera oeste de Xixón, nes que cuasi 1900 escolinos/es de doce colexos participaron nun balagar d'actividaes, toes elles alrodiu la llingua, o con ella como elementu comunicativu. Les xeres feches recuéyense agora nuna páxina web.

Los profesores participantes nesta esperiencia creen que les Xornaes son un programa d'actividaes únicu nel ámbitu educativu asturianu.

Ello ye qu'estes xornaes lleven faciéndose dende hai ocho años nes Escueles Públiques de la fastera oeste de Xixón gracies al llabor de los mayestros y mayestres de Llingua Asturiana, y col sofitu económicu del Ayuntamientu de Xixón (Fundación Municipal de Cultura), La Conseyería d'Educación y Ciencia (dientro del programa Perdayuri Asturies), Caxastur y col esfuerzu y dedicación de la Direición y Personal del Atenéu de La Calzada (F.M.C. de Xixón).

Nestes xeres participen tolos escolinos/es de los Centros.

Nesti cursu 2003-04, les actividaes desendolcáronse dende'l 30 d'Abril hasta'l 7 de Mayu nel Atenéu de La Calzada, Centru Municipal del Natahoyo, y escueles de la fastera oeste deXixón . Les actividaes incluyeron Concursos de cuentos ilustraos, empobináu a escolinos/es de Primer Ciclu de Primaria, de Poesía, dirixíu a escolinos/es de segundu y tercer ciclu de Primaria y que dende esta edición pasa a llamase Concursu de Poesía Escolar "Mª Teresa González", n'alcordanza d'esta escritora xixonesa. Pa escolinos de segundu y tercer ciclu de Primaria faise'l Concursu de Cartelos, y finalmente ta la Olimpiada de Pallabreru, na que participen escolinos/es de los tres ciclos de Primaria.

Estos concursos son oxetu de trabayu puntual nes clases de Llingua asturiana , nes que
s'ellabora tol material col que los neños/es acuden a los certames. Amás, y nel casu de la
Olimpiada de Pallabreru, qu'esti añu algama la so segunda edición, faise en cada centru
escolar una fase previa, de la que salen los finalistes de cada ciclu, que van a la final nel Atenéu, colos cuatro meyores de cada centru, atendiendo a les prebes eliminatories. Enantes, cada mayestru/a, ufiérta-yos a los escolinos/es dellos pallabreros temáticos estayaos en ciclos, que se trabayaron nes clases de Llingua nos caberos meses.

Amás y como s'espeya nes estayes de la web hai distintos talleres d'averamientu a
l'artesanía asturiana, a la naturaleza, música coral asturiana y a la gastronomía. El programa
complétase con espectáculos.