Baille, música y poesía pa celebrar el Día Internacional de los Pueblos Indíxenes

Esti martes en Xixón de magar les 19 hores.

El 9 d'agostu foi la fecha establecida nel 1994 pola Organización de Naciones Xuníes (ONX) pa conmemorar el Día Internacional de los Pueblos Indíxenes. En Xixón dellos coleutivos vienen celebrando dicha xornada dende hai munchos años y esta tarde, a les 19 hores nel Paséu de Begoña, van entamar actividaes col baille, la música y la poesía como protagonistes dientro d'un ambiente reivindicativu.

Nesti 2016, la ONX dedica esti día al derechu de los pueblos indíxenes al enseñu. "El sector de la educación ye un ámbitu especial que non sólo reflexa y condensa los abusos, la discriminación y la marxinación que tradicionalmente sufren los pueblos indíxenes, sinón tamién la so constante llucha pola igualdá y el respetu de los  sos derechos como pueblos y como persones", espresa la organización na estaya dedicada a esta xornada na so web.