Bacteries que comen pel galipote

La Delegación del Gobiernu n'Asturies dio anuncia ayeri de que nel Principáu d'Asturies va aplicase una técnica nueva pa llimpiar los restos de galipote que queden posaos nos llugares más difíciles d'acceder

La técnica, que se conoz comno "biorremediación" parte del usu d'un fertilizante p'ayudar a descomponer les sustancies, fuel nesti casu.

Ello ye qu'un fertilizante arriquecíu con un tantu por cientu grande de nitróxenu, fósforu y fierru afale la multiplicación de bacteries que comen pel fuel hasta desanicialo. La técnica va aplicase de mano en Ribedeva, Colunga y Gozón. Pa llevar alantre'l programa de llimpieza ye preciso aplicar trés vegaes el compuestu en plazos de mes y mediu

El fertilizante que va gastase llámase S-200 y ya s'emplegó en Sálvora, en Galicia pa esti mesmu oxetivu. S-200C ye un potenciador selectivu pa bacteries degradadores d'hidrocarburos y consiste nun núcleu de nutrientes encapsulaos por una membrana oleosa que s'apega al hidrocarburu hasta que la bacteria lu come dafechu conviertiéndolu n'agua y CO2, morriendo darréu la bacteria en faltándo-y el galipote del que s'alimentaba. Según los responsables de la empresa IEP Europe, el S-200 ye un productu que nun ye tóxicu, nun enrita, nun prende y ye ecolóxicu dafechu.