BA y UNA critiquen a Cultura y piden caltener el Derrame Rock

El Bloque por Asturies criticó esti xueves la irresponsabilidá y "incompetencia" de los responsables de la Conseyería de Cultura del Principáu y solicitó que se caltenga n'Asturies la celebración del Derrame Rock.

Pa l'agrupación, el treslláu del festival de Pravia a Ourense ye "un despropósitu causáu por falta d'apoyos públicos per parte del Principáu a los del eventu". Amás destacó que’l festival ye positivu pa "la cultura, economía y turismu" d’Asturies.

El Bloque por Asturies recuerda que'l Derrame llevaba celebrándose quince años en distintos llugares d'Asturies y los últimos siete en Pravia, lo que tornaba a la población en "un puntu de referencia pa esti eventu", consideráu como ún de los trenta festivales más importantes del Estáu español.
  
Al respecto, destaca que miles de persones de tola Península acudíen añalmente al festival -sobre 15.000 persones na so última edición- lo que xenera un activu pa la economía praviana y asturiana, y pal turismu. Amás, asegura que l'eventu daba empléu a una bona cantidá de mozos asturianos, algo, na so opinión, "necesario pa una comunidá tan carente d'ufierta llaboral pa la mocedá".
  
Considera que'l Derrame Rock yera tamién "un bon escaparate pa los músicos asturianos", sometíos a "desprecios" como la programación de los actos institucionales de 8 de setiembre, o la renuncia del Principáu a que'l Festival Intercélticu de Lorient dedicara l'añu 2011 a Asturies.
  
Caltener l’eventu
A lo último, el Bloque considera "inaceptable" que la conseyera de Cultura, Mercedes Álvarez, nun se reuniera col responsable del festival, Enrique Granda, cuando ésti pidió-y ayuda pa caltener l'eventu.
  
Por too ello, el partíu fai un llamáu a los responsables de Cultura y del Derrame Rock pa que reconsideren les sos posiciones y caltengan el festival n'Asturies pol so interés cultural, turísticu, económicu y d'apoyu a los músicos asturianos".
 
Crítiques d’UNA
Pela so parte, el voceru de cultura d'Unidá Nacionalista Asturiana, Ignaciu Llope, consideró "llamentable" la marcha del Derrame Rock de Pravia, yá que constituyía un eventu cultural de primer orde al igual qu'un elementu de promoción de Asturies en xeneral y Pravia en particular perimportante.
  
Al traviés d'un comunicáu, el responsable de la organización señaló que "el festival axuntaba a una gran cantidá de xente nun conceyu asturianu alredor de la música fuera de los cnales más comerciales, amás de ser centru d'actividaes divulgatives y de carácter solidariu". 

UNA considera "interesante saber qué criterios usa la Conseyería pa dar sofitu a unes inciativas sí y a otres non, yá que, al paecer d'UNA, la manera d'actuar de la Conseyera nun tien esplicación". "La renuncia al Añu d'Asturies n'An Oriant o'l festival Derrame Rock, son exemplos perclaros d'eventos que, amás de fomentar la cultura dándonos a conocer fuera o trayendo lo que se fai n'otres partes y amosando lo que facemos nós, suponen un importante desendolcu económicu y cultural pa la nuestra tierra, que revierte n'abondo na sociedá la inversión que se fai", señala la formación.

Esplicaciones a Álvarez
A lo último, el voceru de cultura "pidió a la Conseyera de Cultura Mercedes Álvarez que confirme o desmienta les declaraciones del promotor del festival nes qu'afirmaba que se negó a aconceyase con él. De confirmase, taríamos ante otra muestra del "despreciu dafechu de la nuestra Conseyera de Cultura a la nuestra cultura, demostrando'l paletismu provincianu acomplexáu d'esti gobiernu, que considera qu'ún pue sentise arguyosu de too, menos d'Asturies, la so xente, la so llingua y la so cultura".