BA va solicitar que’l Plenu debata la proposición del maltratu animal

El Bloque por Asturies va presentar nel próximu conceyu de la Xunta de Portavoces la proposición de llei pa poner fin al maltratu animal n’Asturies. L’oxetivu ye incluyila nel Plenu de la Xunta Xeneral pal so debate.

Dende’l Bloque señalen qu’esta proposición yá pasó “tolos trámites parlamentarios favorablemente” y que’l Conseyu de Gobiernu “nun negó espresamente la so conformidá a la tramitación”.

D’esti mou, el portavoz del Grupu Parlamentariu Mestu, Roberto Colunga, va incluyir la proposición na próxima reunión de la Xunta de Portavoces pa que se debata nel Plenu la modificación del artículu 20 de la Llei del Principáu d’Asturies d’espectáculos públicos y actividaes recreatives pa incluyir les corrides de toros como maltratu animal.