BA recurre a la Procuradora pol "bloquéu" a la so acción política

El diputáu Bloque por Asturies, Roberto Colunga, y el voceru, Rafael Palacios, anunciaron que van recurrir a la Procuradora Xeneral pa qu'investigue "el bloquéu" qu'exercen el restu de grupos parlamentarios a la so acción política.

Según espunxeron los trés grupos "del réxime", en referencia a PSOE, PP y IU-Verdes, tán evitando sistemáticamente que les iniciatives de Colunga, incluyíes interpelaciones o solicitúes de comparecencies, se debatan nel Plenu de la Xunta Xeneral.
  
Calificaron al voceru del PSOE, Fernando Lastra, como "el voceru del réxime" y dixo que ye él el que s'encarga de frenar les sos propuestes. "Cuando llega la Xunta de Voceros y trátense los asuntos que van al plenu, él pide que se voten por separáu, y toos se ponen d'acuerdu en refugar les nueses iniciatives", comentaron dende Bloque, nuna rueda prensa ofrecida na Xunta Xeneral del Principáu.
  
Rafael Palacios comparó la situación que vive Bloque nel Parlamentu n'Asturies cola que vivió na Comunidá Valenciana el grupu parlamentariu de Compromís. Ellí, el Tribunal Constitucional (TC) consideró que la Mesa de les Corts vulneró los derechos fundamentales de diputaos al refugar sin motivu xustificáu una serie d'iniciatives parlamentaries.
  
No que se refiere a Asturies, Palacios señaló que tanto al PSOE como a IU Verdes, socios de Gobiernu, molésta-yos especialmente qu'exista una "verdadera oposición", señalando que'l PP tamién ye parte del réxime" y "vive mui bien instaláu ehí".
  
Amás, refugó les acusaciones hacia Roberto Colunga, que lu tachó de tránsfuga y señaló que'l Reglamentu de la Xunta Xeneral dexa claro que nun lo ye. "Somos una fuerza política más", calcó. Asina, faló d'una campaña de descreitu hacia'l Bloque. "Nós tamién podríamos falar de 'camorra siciliana', exércitu de Pancho Villa o palancaneros...", dixo.
  
Mostró una llista de 8.000 firmes de vecinos de Llanes que reclamen la puesta en marcha d'un serviciu de rayos X, como exemplu d'una de les reivindicaciones que lleva'l Bloque a la Xunta. "A ver cómo respuende'l réxime", comentó.

Presupuestu
Amás, Roberto Colunga reclamó la supresión de la asignación presupuestaria a los grupos parlamentarios, que supón 2,5 millones d'euros añales. Con esi dineru, señaló tendría que compensase a los trabayadores de la Xunta a los que se-y recortó'l salariu y destinase a polítiques sociales nel Principáu.
  
Les cantidaes percibíes por esi conceptu repártese ente PSOE (988.000 euros), PP  (971.000 euros), IU-Verdes (515.000 euros) y BA (17.500 euros).
  
"Ye intolerable", señaló Colunga, qu'esixó la supresión d'eses cantidaes "sosteníes polos que tán pidiendo sacrificios a la población". Nos presupuestos del 2010 había conseñaos 2,5 millones pa esi conceptu, mientres que pal 2011 aumenta en 11.000 euros. El Presupuestu total de la Xunta Xeneral pal 2011 va ser de 13,9 millones, inferior a los 14,8 millones de 2010.