BA propón que’l profesoráu puea cobrar les cantidaes atrasaes

El diputáu del BA, Roberto Colunga, rexistró na Cámara una proposición non de llei pa que los profesores que nun firmaron puean cobrar les cantidaes atrasaes de la carrera profesional.

La proposición beneficiaría a los docentes que nun s'acoyeron a una resolución  declarada nula xudicialmente y a los que tán "discriminando salarialmente" dende 2007.

olunga presentó esta iniciativa nuna rueda prensa na que tuvo acompañáu pol voceru del sindicatu SUATEA, José Antonio Alonso, y el voceru del Bloque por Asturies, Rafael Palacios.
  
Palacios llamentó'l desastre "organizativu" ente les conseyeríes d'Alministraciones Públiques y d'Educación, que demostraron la so "incapacidá", faciendo gala d'una "chambonada permanente" que ta faciendo "dañu" a la enseñanza pública.
  
Pela so parte, Alonso agradeció al Bloque que presente la iniciativa y dixo que ye un problema qu'afecta a miles de profesionales.

Colos trabayadores d’El Comercio
Per otru llau, el Bloque por Asturies llamentó al traviés d’una nota de prensa la intención de la dirección xeneral de 'El Comercio' de pesllar la rotativa del periódicu en Xixón y treslladar definitivamente la impresión del diariu a una planta en Zamora.

Los nacionalistes denuncien que la midida “va suponer el desaniciu de cuasi una treintena de puestos de trabayu” y que ye’l “primer pasu na deslocalización del periódicu decanu de la prensa asturiana, que nunca nun sufriera un procesu despidu colectivu nos sos 132 años d'esistencia”.

Dende’l BA sorrayen también que, según los datos facilitaos pol comité d’empresa, ‘El Comercio’ “nun presenta anguaño situación de pérdides económiques”, y encamienten a la dirección xeneral de la empresa a reconsiderar la so decisión.