BA critica’l pautu supuestu de PSOE, IX y PP contra’l so diputáu

El Bloque por Asturies calificó de “antidemocráticu” el pautu supuestu contra Roberto Colunga que dexó cayer el popular Ramón García-Cañal el martes. Palacios pide “valentía” a los tres grupos parlamentarios pa que reconozan esi pautu públicamente.
 
Na rueda de prensa convocada pol PP esti pasáu martes, protagonizada por Ramón García-Cañal y José Agustín Cuervas-Mons, pa reclamar la intervención de la conseyera d’Alministraciones Públiques na comisión de Alministraciones, los populares reconocieron que refugaron la petición de Roberto Colunga, diputáu del Bloque, del día anterior nesi mesmu sentíu al consideralu un ‘tránsfuga’. N’opinión del partíu nacionalista, esti fechu demuestra la esistencia d’un pautu ente los tres grupos parlamentarios pa baltiar toles iniciatives parlamentaries del so diputáu.
 
Pa Rafael Palacios, candidatu de BA-UNA pa les elleiciones de mayu, esi pautu ye "antidemocráticu" y reta al PSOE, IX y PP a que tengan "valentía" y reconozan públicamente la esistencia del mesmu. Tamién defendió la lexitimidá de Colunga y dixo que los tres partíos saben que si Colunga fuera un ‘tránsfuga’ nun podría ser el voceru d'un grupu parlamentariu.
 
Otra manera, Palacios tamién llamentó que les tres formaciones "opónganse" sistemáticamente a investigar los aspectos políticos de la 'Operación Marea', la trama presunta de corrupción que caltién na cárcel al ex conseyeru d’Educación y Ciencia, José Luis Iglesias Riopedre.