Ayer y Xixón promociónense en Saint-Nazère xunto con otres ciudaes de la Ruta de la Plata

Les ciudaes de la Ruta de la Plata van facer promoción turística en Saint-Nazère esta fin de selmana aprovechando’l puxu de l’Autopista del Mar ente esti puertu de la Bretaña histórica y El Musel. Ayer y Xixón van tener un stand propiu.
 
La Rede de Cooperación de Ciudaes de la Ruta de la Plata, compuesta por 27 municipios, ente los que tán los conceyos asturianos de Xixón, La Ribera, Morcín, Riosa, Mieres, Ayer y Ḷḷena, entama esti eventu que tien como oxetivu mostrar a la población d’esta zona de la Bretaña histórica los atractivos d’esta ruta que xune Xixón con Sevilla. En concreto, trátase d’un mercáu al aire llibre nel centru d’esta población de 70.000 habitantes cercana a Naunnt/Nantes que va tar abiertu’l sábadu y el domingu.
 
Nél, los visitantes van atopar productos gastronómicos y artesanos d’Asturies, el País Lleonés, Extremadura y Andalucía, amás d’información turística de la ruta. Ayer y Xixón apostaron nesta cita por tener un stand propiu nel que tamién mostrar les escelencies de los dos conceyos. Asina, según informa’l Conceyu d’Ayer, va apostar pola promoción los recursos naturales, culturales y gastronómicos del conceyu, asina como la Estación Ivernal ‘Fuentes de Invierno’ y l’espectáculu natural de la Berrea.
 
Tamién van contar con stand propiu nesta feria de promoción de la Ruta de la Plata’l Mercáu Ecolóxicu y Artesanu de Xixón, Sidra Trabanco, Sidra Menéndez, Sidra Bernueces, Embutidos Casa Milia, Embutidos Artesanos Viejo, L’Ayerán Productos Artesanos, Quesería Artesana La Figar, Hotel Resort Spa Valbusenda, Encajes Elena, Embutidos La Jurre, Quesería Rafael Pajuelo Torta del Casar, Anís Los Hermanos-Licores Triunfo y la naviera LD Lines. Hai que destacar qu’esti eventu coincide nel tiempu col cabudañu de la inauguración de la Autopista del Mar ente Asturies y la Bretaña histórica, que movió nesti tiempu 42.000 persones, ente camioneros y turistes.