Ayer sigue un procesu alternativu pa la so toponimia

Dempués d'otra selmana más ensin que pasare nengún espediente toponímicu pel Conseyu de Gobiernu d'Asturies, el llabor de la Xunta de Toponimia y de los Conceyos sigue intensamente. Si esta selmana la Xunta de Toponimia celebraba una sesión de trabayu en Paraes (Nava) pa tratar sobre la toponimia de los conceyos de la Comarca de la Sidra, el Conceyu d'Ayer daba anuncia de que ta tramitando'l so espediente toponímicu.

Ello ye que'l conceyu ayerán ta siguiendo pa ello un trámite distintu y, si cabe, más participativu, como apuntó a Asturies.com el conceyal de cultura, Santos Fernández Fanjul. Si nos más de los casos los espertos de la Xunta Asturiana de Toponimia (XAT) proponen un llistáu colos nomes de llugar del conceyu al que dempués les autoridaes del conceyu puen proponer amestadures y suxerencies, nel casu ayerán la propuesta de la XAT, dempués de consensuase cola corporación, va pasar per un trámite d'información pública nel que vecinos y entidaes ayeranes van poder facer tamién les sos propuestes. En pasando esti plazu, la propuesta toponímica ayerana va pasar per segunda vegada per plenu, d'au va elevase a que pase'l trámite del Conseyu de Gobiernu.