Avilés y Cangas yá tienen los sos responsables de normalización

El filólogu avilesín Cesáreo García Fernández ye'l primer responsable al cargu de la Oficina llingüística y de promoción de cultura tradicional asturiana del Conceyu d'Avilés. El cargu de Cesáreo va ser el de tar al frente de toles iniciatives a favor de la llingua asturiana que se faigan dende'l Conceyu.

Per otra parte, l'espertu en Filoloxía Asturiana Nacho González salió escoyíu pol tribunal como la persona encargada de facese cargu del Serviciu de Normalización de Cangas del Narcea. Natural de les Regueres, Nacho ye tamién conocíu pol so llabor nel equipu de la emisora Radio Sele que tolos domingos radia los partíos del Real Uviéu. Dende la selmana qu'entra, y de miércoles a vienres, Nacho Rodríguez va tar a disposición de tolos ciudadanos de Cangas nel Edificiu de Servicios Múltiples -estación d'autobuses- na mesma planta que'l telecentru.

L'oxetivu d'esta oficina, según s'apunta dende Cangas, va ser el de "facer normal a nivel institucional lo que ya ye normal na cai". Acordies con esti planteamientu, el Conceyu reconoz que "l'asturianu ye una realidá llingüística nel conceyu, ello ye, una llingua que la falen los ciudadanos o una parte d'ellos. Ente los oxetivos que se marca'l conceyu a conseguir con esti serviciu va tar el de facer visible l'asturianu ufiertando un serviciu permanente de traducción, ellaborando documentos públicos n'asturianu, poniendo carteles indicativos en llingua asturiana y implicando na promoción llingüística a les entidaes públiques y tamién a les particulares. Asina, una de les primeres actuaciones del Serviciu va ser l'aconceyar coles asociaciones del conceyu pa conocer les sos necesidaes en materia llingüística y proponé-yos un marcu de collaboración.

La toponimia tradicional márcase como una prioridá absoluta -Cangas yá-y tien pidíu a la Xunta de Toponimia del Principáu d'Asturies l'espediente colos topónimos del conceyu- anque dende la Conceyalía, recuérdase la dificultá qu'entraña esti llabor de recuperación toponímica nun conceyu qu'incluye cerca de trescientos pueblos y que con cerca d'ochocientos kilómetros cuadraos d'estensión ye'l más grande d'Asturies, lo que fai que tenga un volume mui grande de nomes de llugar.