Avilés recuerda a Matilde de Soignie pola Selmana de les Lletres Asturianes

Estrenóse n'Internet un documental y va entamase un alderique sobre la escritora llocal, segunda muyer conocida que vio imprentada la so obra n'asturianu depués de González Rubín.

Foi nel añu 1890 cuando Matilde de Soignie imprentó'l so manuscritu entituláu 'Ecos de mi aldea', fechu que desveló nel 2021 Inaciu Galán y que confirma que tenía vocación de dar a conocer les sos creaciones. Agora'l Conceyu d'Aviés, al traviés de la Estaya de la Llingua, quier recordar con motivu de la Selmana de les Lletres Asturianes a esta muyer perteneciente a la burguesía de la villa nacida nel sieglu XIX.

El vienres, Día de les Lletres Asturianes, diose a conocer el documental, dirixíu pol propiu Galán, qu'esta tarde va proyeutase a les 19.30 hores nel Palaciu de Valdecarzana. Darréu va entamase un alderique nel que van participar l'académicu nuevu xunto con Mercedes de Soignie, investigadora y bisnieta sobrina de Matilde, y Xosé Ramón Iglesias Cueva, secretariu de l'Academia de la Llingua Asturiana y estudiosu de la vida y obra de la escritora avilesina, que van aportar más novedaes sobre l'autora.