Avilés festeya'l San Patricio n'Asturies

La cultura musical asturiana protagoniza l'axenda d'ociu d'esti fin de
selmana. Y ye qu'esti sábadu conmemoráse en tol mundu la
festividá de
San Patricio, patrón d'Irlanda, una ocasión que-y sirve a
l'asociación cultural Esbardu,
organizadores del Festival Intercélticu d'Avilés, pa celebrar
"San
Patriciu n'Avilés", una fiesta que dende les 19.30 h. na plaza
de Carlos Lobo va contar cola actuación de la Banda de Gaites Villa
d'Avilés, Grupu d'Espresión tradicional
"Principáu", del músicu Héctor Braga,
Tuenda y
Los
Llanzones. Esi mesmo día, pero en Xixón, vamos poder
tamién averanos a la musica del nuesu país al traviés de
los "Alcuentros
cola Tradición Oral" organizaos pola asociación "La
Quintana" y que van prolongase hasta'l domingu.

Otra actividá musical pa esti fin de selmana, alloñada dafechu
de les propuestes anteriores, ye'l conciertu que'l míticu grupu de
música pop español "Los Secretos" va ofrecer na
sala El Jardín de Xixón a les 22:00. Fundáu en plena
"movida madrileña" polos hermanos Urquijo (Javier, Enrique y
Álvaro), y el batería, compositor y cantante, Pedro Antonio
Díaz,y encuadráu en sos oríxenes, xunta otres bandes como
Nacha Pop, Mamá y Trastos, nel renovador movimientu de música
popular que vino a llamase "Nueva Ola madrileña", Los Secretos
descubriéronse al traviés de más d'un cuartu de sieglu
n'activu, y gracies a numberoses canciones consideraes clásiques (ente
les que figuren "Déjame", "Sobre un vidrio mojado",
"Ojos de perdida" o "Pero a tu lado") como una de les

agrupaciones más relevantes de la historia de la música pop
española. Mas actividaes d'ociu pa esti fin de selmana n'Asturies na
nuesa axenda.