Avilés entra n’alerta naranxa’l día nel que salen Llaviana y Llangréu

|
Avilés

Con un incidencia de 199 casos de COVID-19 por cada 100.000 habitantes nos 14 díes últimos, Salú decidió declarar l’alerta naranxa n’Avilés nuna xornada na que los conceyos de Llaviana y Llangréu salen d’esti estáu d’alvertencia. Esti martes rexistráronse 183 contaxos, superando una positividá del 5 por cientu, y 4 muertes.

Llaviana, 3 selmanes depués, y Llangréu, qu’entrara n’alerta naranxa hai dos selmanes xunto con Samartín del Rei Aurelio, conceyu que va siguir polo menos 7 díes más, dexen esti estáu tres ameyorar los datos de la COVID-19. Hasta’l día 18 van siguir en Xixón y Ponga; el 22 Ḷḷena y Trubia (Uviéu); y el 23 Mieres, los llugares del país nel qu’intensificaron les aiciones de proteición, vixilancia y seguranza ente’l coronavirus SARS-CoV-2 a los que s’incorporó ayeri a Avilés.

La Conseyería de Salú, a falta de comunicar los datos oficiales de la COVID-19, anunció qu’ayeri hebo 183 contaxos, lo que significa 44 más que’l día anterior. Una cifra alta que, con 3.117 pruebes PCR feches, pon la tasa de positividá nel 5,87 por cientu, perriba del 5 por cientu que marca la Organización Mundial de Salú (OMS) como llende pa tener controlada la pandemia.

Esta tarde va aconceyar el Comité de Siguimientu de la Normalidá Nueva que preside Adrián Barbón y nel que participen, amás de miembros del Executivu, la Delegación del Gobiernu estatal n’Asturies y la Federación Asturiana de Conceyos. Na mesma van decidise midíes “drástiques” acordies a la situación actual de la pandemia de COVID-19 que va comunicar a les 18.30 hores el llavianés en compañía del conseyeru de Salú, Pablo Ignacio Fernández Muñiz, y del direutor xeneral de Salú Pública, Rafael Cofiño.

Dos homes y dos muyeres

Na xornada hebo que llamentar la muerte de dos homes de 100 y 90 años y dos muyeres de 89 y 85. El númberu de finaos dende qu’entamó l’andaciu queda en 370.

Salú sigue llamando a los veceros de los ximnasios McFIT y el AltaFit Natahoyo, en Xixón, y Quirinal 14 Sport, n'Avilés, del 17 de setiembre al 8 d’ochobre; amás de los del chigre El Duende, en Trubia (17 de setiembre al 8 d'ochobre), el restorán La Panoya, en Cenera (21 de setiembre al 8 d'ochobre); y Casa Eliseo, de L'Entregu (19 de setiembre al 8 d'ochobre), a ponese en contautu coles autoridaes sanitaries polos biltos ehí llocalizaos. Han de rellenar esti formulariu o llamar al teléfonu 984.10.04.00 y llendar la so vida social.

Contador Estadistiques