Avanza'l reciclao d'aceite

L'ayuntamientu de Cangas del Narcea ta acabante de firmar un conveniu por cinco años cola Xunta Local d'Hostelería y la empresa Pumariega Xestión pa la recoyida y reciclaxe del aceite y grases vexetales que se produzan nos establecimientos hosteleros del conceyu. Hasta agora, esi aceite marchaba pel desagüe, siendo como ye un axente contaminante. La concesionaria va poner contenedores nos puntos de recoyida y va treslladar l'aceite a plantes de reciclao industrial onde va emplegase na fabricación de biodiesel, combustible non contaminante pa motores d'explosión.

Cangas del Narcea conviértese asina nun de los primeros ayuntamientos de menos de 50.000 habitantes n'Asturies que faen un conveniu d'estes característiques y que demuestra un enfotu claru por reciclar esti material. Pumariega ye una empresa asociada a los promotores de la fábrica de reciclao d'aceite vexetal pa la producción de biodiesel que va asitiase en Samartín del Rei Aurelio, y tien firmaos convenios asemeyaos colos conceyos de Mieres, Xixón y Samartín del Rei Aurelio.