Autores nel Camín sigue con alcuentros con Álvarez, y Galán y Suari

|
Circuitu Autores nel Camín

El ganador del Premiu Xosefa Xovellanos del añu 2019 va aldericar colos sos llectores estos díes próximos en Nava y Riañu, y los del Premiu María Josefa Canellada del 2020, en Carreño.

Autores nel Camín, el programa de la Conseyería de Cultura, Política Llingüística y Turismu que naz pa poner en contautu col públicu a los autores que llevaron los diferentes Premios Lliterarios, entama dos eventos nuevos. Los sos protagonistes son Francisco 'Paco' Álvarez, y Inaciu Galán y Vero Suari.

Nava va acoyer mañana un alcuentru col autor de 'Los xardinos de la lluna', XL Premiu Xosefa Xovellanos de novela, correspondiente al añu 2019. Ésti encuádrase nos Talleres de Llectura n'Asturianu en Nava qu'entama'l Serviciu de Normalización Llingüística 'Comarca de la Sidra', con entamu previstu pa les 19 hores na Casa Cultura Marta Portal.

Nun va ser la única participación d'Alvárez n'Autores nel Camín, qu'anunció tamién la so presencia'l llunes a les 19 hores nun actu en Riañu cola Biblioteca Federico García Lorca como sede. Más alantre va aldericar con llectores en Corvera (20 de mayu), Villaviciosa (27 de mayu) y Candamu (16 de xunu).

En Candás

‘La curuxa Catuxa’, obra ganadora del XIII Premiu María Josefa Canellada de lliteratura infantil y xuvenil, correspondiente al 2020, va protagonizar l'alcuentru del vienres en Candás. Galán y Suari, los sos autores, van tar a les 18 hores na Cafetería Principado de Asturias pa falar cola reciella y los sos familiares.

Contador Estadistiques