'Autores nel camín' aporta a Morea, Campumanes y Castropol

Participen los escritores José Ángel Gayol, Sidoro Villa y María José Fraga.

El circuitu 'Autores en camín', qu'entama alcuentros colos ganadores de los diferentes Premios Lliterarios en dellos puntos del país, tien una triple cita mañana. L'oxetivu ye ponelos en contautu colos llectores y, al empar, dar a conocer la so obra.

Gayol va tar a les 19 hores nel Centru Cultural de Morea pa falar de 'El silenciu invisible', obra ganadora nel 2019 del Premiu Máximo Fuertes Acevedo d'ensayu. El mierense amás ta acabante de llevar el Premiu Xosefa Xovellanos de novela con 'La cafiante muerte de Nicolai Bostov'.

L'añu pasáu esti gallardón foi pa 'El fervinchu', de Villa, que va tar presente a les 19 hores nel Centru de Cultura La Casona de Campumanes. Una cita especial pol so pasáu como maestru na población ḷḷeniza y les sos munches amistaes nel conceyu.

Tamién el gallego-asturiano

La Conseyería de Cultura, Política Llingüística y Turismu tamién inclúi'l gallego-asturiano dientro d'esta iniciativa. Asina, a les 19.30 hores na Biblioteca de Castropol va tar Fraga pa falar de la so obra última, 'Equipaxe de mao'.