Australian Blonde presenta’l so nuevu discu nel festival de cine

Esta nueche na sala de conciertos "Albéniz" de la Cai San Bernardo, el grupu de Xixón presenta "Canciones de amor y gratitud" sétimu discu de la banda nel que se cuenta cola collaboración de Pablo Errea, del grupu Edwyn Moses., que toca'l baxu en sustitución de Tito, ún de los históricos del grupu

"Canciones de amor y gratitud" son 12 temes de pop que Fran Fernández define como "el meyor de la carrera del grupu" una carrera qu'entamó va diez años dempués de que "La posada de Morgan" nome pol que se-yos conocía a primeros de los 90, cambiare nel 1993 a "Australian Blonde" y s'espublizare "Pizza pop" ún discu de debú acabante de reeditar y que s'estrema muncho del pop más orquestáu y preciosista que faen agora los Australian, o, si se quier, lo que queda d'ellos, dempués de los cambeos de formación pelos que pasaron.

Preba d'esa evolución ye la presencia d'instrumentos como l'oboe que se siente nun de los temes, "Control" y l'apertura a otros soníos que se separten de lo que ye talamente pop.

Pel camín quedaron los sos mayores ésitos con "Aftershave" el discu del 1995 qu'enxertaba'l célebre "chup chup" y l'abandonu del grupu del batería Roberto Nicieza y agora'l de Tito Valdés. Lo que nun cambia xunta la presencia de Fran Fernández, líder de la banda, ye la producción de Paco Loco, la solombra omnipresente del Xixón Sound.

El conciertu de los Australian entama a les 12 de la nueche na sala Albéniz nesti conciertu paralelu al Festival de Cine de Xixón. La entrada ye llibre.