¿Áu ta'l "Prestige"?

Esta mañana, el petroleru Prestige acabó de francer en dos cachos, como contaben que socediere. Anque ello nun dexa de ser noticia, parez que'l públicu nun ta enterándose de tolo qu'arrodia al barcu que ta enllenando de galipote la costa de la vecina Galicia y qu'entovía guarda 70.000 tonelaes de petróleu, muncho más del que yá echó a la mar.

Ello ye que dende l'asociación ecoloxista Greenpeace denuncien que, anque'l Gobiernu español asegura que'l barcu rompió en territoriu portugués, los datos ded coordenaes apurríes del allugamientu del petroleru nun concueyen con esa afirmación. Según Greenpeace, el Gobiernu diz que'l Prestige taba nesi momentu a 42º 26´09 N de latitú y 11º 24´00 W de llonxitú, datos que, según Greenpeace caen a l'altura de Pontevedra, non de Portugal. La prensa portuguesa vien a da-y la razón a Greenpeace, afirmando que'esta mañana teníen el barcu a 50 milles d'entrar en terrén d'ellos; sicasí, tea o nun tea pa la parte de Portugal, les autoridaes d'aquel país yá tienen decretao l'alarma dende Viana do Castelo hasta Oporto. Otramiente, dende Greenpeace dicen que nun son quien a entender por qué'l Gobiernu nun trai un barcu cisterna en que descargar la mercancía del petroleru accidentáu, y critiquen la falta de xacíu de les autoridaes al querer echa-yos el muertu a los portugueses.