Atlas marineru

La otra selmana presentose l'Atlas Marineru d'Asturies d'Emilio Barriuso, una obra enciclopédica sobre la mar asturiana que recueye tol vocabulariu rellacionaú cola mar, dende los nomes de pexes y páxaros que viven nesi mediu hasta les pallabres que falen de l'actividá humana rellacionada cola mar en tola costa d'Asturies. El volume, espublizáu pol Principáu y el Real Institutu d'Estudios Asturianos, ye'l resultáu del trabayu de toa una vida, en cuantes que l'autor lleva yá dende los años 60 atropando términos y faciendo, por cuenta propia, un importantísimu trabayu de campu que valió pa que quedare testimoniu, arriendes de los términos vivos, d'auténtiques ayalgues idiomátiques yá desapaecíes como ye, por poner un casu, tola terminoloxía que fai referencia a los apareyos de vela de los barcos antiguos, de los que cuando Emilio Barriuso entamó col trabayu yá nun quedaba más que l'alcordanza de la xente más vieyo y de los que gracies al so llabor va quedar memoria per escrito. Como cosa curiosa pa los neófitos nesti asuntu podemos comentar que, anque la obra ye de lo más importante, el llabor d'Emilio Barriuso nun acaba con esti llibru, yá que l'investigador tamién tien un catálogu bien curiosu de talasónimos, los topónimos de la mar, nomes qu'identifiquen llugares de pesca, poces y cantos marinos que la xente de la mar ye quien a identificar ensin mayor problema en medio del agua énte'l plasmu del terrestre.

Contador Estadistiques