Atlético Astorga y Boiro, rivales de Sporting B y Marino na primer ronda de la Copa Federación

Sporting B y Marino van enfrentase en dieciseisavos de final de la Copa Federación estatal col Atlético Astorga y el Boiro. Los partíos d'ida van disputase n'Asturies el 4 d'avientu.

El filial del Sporting, campeón del sector asturianu al vencer nos penaltis al UP Langreo tres acabar el partíu con un empate a dos goles, va vese les cares col Atlético Astorga, equipu del so mesmu grupu en Segunda División B col que ta empatáu anguaño na tabla a 12 puntos. Los de Tomás lleven una racha de trés trunfos siguíos tres ganar ayeri en Mareo al Marino que-yos permite salir de los puestos de descensu al ocupar la decimocuarta posición.

Esa derrota, pela so parte, funde un poco más a un Marino que nun acaba d'arrancar pese al cambiu d'entrenador. Marco Díaz garró hai dos selmanes al club lluanquín tres la renuncia de José Luis Quirós pa tratar de da-y un aire nuevu al equipu, pero sumó dos derrotes énte l'Uviéu y el filial sportinguista que caltienen a los de Miramar como colistes del grupu. El Marino llega a la Copa Federación vía Copa, tres perder col Avilés nos penalti na primer eliminatoria del tornéu del KO, y va tener como primer rival al Boiro, equipu de la zona baxa de la Tercera gallega –ye decimoquintu con 13 puntos, dos enriba del descensu– que se proclamó campeón del sector gallegu de la Copa Federación tres derrotar al Coruxo na final por 3-1.

Los partíos d'ida van celebrase n'Asturies el 4 d'avientu, mentes que la vuelta ta programada pal 18 d'esi mesmu mes. El restu de cruces de los dieciseisavos de final son los siguientes: Real Unión-Amorebieta, Tropezón-Gimnástica, Osasuna B-Haro, Varea-Arandina, Prat-Almudévar, Mercadal-Atlético Baleares, Puertollano-Castellón, Conquense-Cartagena, Arroyo-Linares Deportivo, Marbella FC-San Roque, Móstoles-Trival Valderas y Atlético Granadilla-Toledo. Pasen a octavos de final por sortéu'l Gerena y l'Unión Viera.