Ataquen seis sedes del Partido Popular na madrugada del martes

Les sedes del Partido Popular (PP) de Mieres, Ayer, Uviéu, Xixón, Siero y Llaviana sufrieron ataques na madrugada del martes. Éstos taríen venceyaos cola fuelga indefinía que mantién el sector mineru del carbón.
 
Los cristales de les sedes popular de Mieres, Uviéu y Xixón apaecieron manchaos de pintura negra. El secretariu xeneral del PP de Mieres, Luis Miguel Fernández Berandón, señaló tres conocer la noticia que "estos actos nun representen a los mineros nin a los vecinos". Nesti sen, esixó a los representantes de los sindicatos mineros "qu'indique a los que tán na cai, defendiendo a la minería, qu'ésti nun ye'l camín". "Conocemos el problema nes zones mineres y apoyamos mociones nel Plenu del Conceyu de Mieres pa mostrar el nuesu apoyu", añadió'l secretariu xeneral. Al empar, destacó que se presentó una denuncia pa que s'abra una investigación sobre los fechos. Nel casu de Mieres, ésti ye’l cuartu actu vandálicu que sufre’l local dende que Mariano Rajoy garrara la presidencia del Gobiernu estatal
 
Mentes, n’Ayer –trés díes enantes yá tiraren güevos a los cristales– y Siero, el local popular amaneció cola cristalera frayada y, nel casu ayerán, con un sacu de carbón na puerta. El voceru de la formación popular nesti conceyu, Juan Antonio del Peño, condenó los actos y dexó nidio que, al so xuiciu, "ésta nun ye la forma de llograr una solución pa la minería". Al empar, señaló que "el PP d'Ayer siempre apoyó'l carbón, igual non pela vía del enfrentamiento, pero sí pela negociación colos nuesos dirixentes". Ante esta situación, Del Peño púnxose en contactu colos representantes de los sindicatos nel conceyu p'alcordar un alcuentru y "falar de lo asocedío". Otra manera, la sede de Llaviana sufrió un llanzamientu de güevos.
 
Na semeya, estáu nel que quedó la sede del PP en Mieres.