Asuntos Esteriores respuende a la carta de Valledor

Alberto Navarro, secretariu d'Estáu pa la UE, diz que nun va
traducise la carta magna de la UE al asturianu por nun ser una llingua
oficial



La Conseyería de Xusticia, Seguridá Pública y
Rellaciones Esteriores recibió esta mañana rempuesta de la carta
que-y unviare'l Conseyeru d'Asuntos Esteriores Javier Valledor al Ministru
d'Asuntos Exteriores Miguel Angel Moratinos y na que se pidía que se
reclamare igual tratu pal asturianu na UE que les demás llingües
del estáu. Anque la UE nun va aceptar la oficialidá de
llingües como'l catalán o'l vascu, si ye bien fácil que les
llingües cooficiales del estáu reciban como premiu de
consolación el que la futura constitución europea se traduza a
eses llingües, ente otros reconocimientos. La carta del Ministeriu que
lleva Miguel Ángel Moratinos certifica que l'asturianu, por nun ser
oficial nel so territoriu correspondiente, queda fuera de cualquier posible
midida de reconocimientu, que yá ye dificil pa les llingües que
sí son, anque la carta d'esteriores dexa una puerte abierta a
reconocimientos futuros gracies al testu que mandó amestar España
na Conferencia sobre'l Proyectu de Tratáu Constitucional confirmando'l
compromisu de la UE cola diversidá cultural y llingüística
d'Europaa.



Na curtia rempuesta del Ministeriu a Valledor, que vien firmada por
Alberto Navarro, secretariu d'Estáu pa la UE, el gabinete del ministru
diz "tomar mui bona nota de les esmoliciones" del Conseyeru y
"en concretu del so interés pola diversidá cultural y
llingüística d'España" y diz que, anque l'asturianu nun
tien estatus de llingua oficial n'Asturies "ello nun quita pa que seya
oxetu d'especial atención por parte de la Unión en cuantes se
ratifique y entre en vigor el Tratáu pol que s'apaute una
Constitución Europea".

Ver equí la carta
d'Alberto Navarro a Valledor