Asturies.com ufierta'l conteníu del Plan de Normalización

Asturies.com tuvo accesu al documentu aprebáu ayeri en Conseyu de Gobiernu, que-yos ufierta a los sos llectores. Les 68 midíes del esperáu Plan de Normalización del Asturianu que s'aprebó ayeri enxértense nel documentu final alredor de seis estayes temátiques.

La primera d'elles fala de la normalización nel ámbitu institucional y nelli repásense toles midíes a tomar dientro de l'alministración autonómica. L'usu del asturianu nel portal oficial del Principáu, publicaciones y propaganda de les distintes conseyeríes yl'enxertamientu d'identidá gráfica billingüe pa los organsmos oficiales son delles de les midíes que se contemplen equí, proponiendo tamién que se faiga un conveniu cola alministración del estáu pal usu del asturianu y gallego-asturianu por parte d'esta. Esti primer bloque fai mención a l'Academia de la Llingua cola que se propón "Collaborar nel desarrollu de les funciones que-y atribuye la Llei 1/98". Un separtáu final d'esti primer bloque, que tamién afala l'usu del asturianu n'actos públicos y el so deprendizaxe pol personal de l'alministración, fai referencia a la normalización nel ámbitu de los conceyos.

La segunda estaya del plan dedícase a las normalización nel sistema educativu, y pa ella márcase l'oxetivu de "Garantizar, nes meyores condiciones, el derechu a la enseñanza de la llingua asturiana y del gallego-asturianu nel so ámbitu" comprometiéndose a "Completar la redacción de los currículos" o a "Garantizar la ufierta de la materia en tolos niveles educativos" anque siempre "respetando la voluntariedá" falando un puntu específicu de "Asegurar na enseñanza del asturianu y del gallego asturianu el cumplimientu de les ratios mínimes d'alumnos" la enseñanza d'adultos y el reconocimientu de la especialidá en fililoxía asturiana son otros de los oxetivos d'esta estaya que prevé una collaboración estrencha cola universidá.

La tercer estaya del plan ye la que s'encarga de la toponimia. Ente los oxetivos d'esti separtáu del plan ta'l tener fechu pal añu 2007 un mapa y un nomenclator con tolos topónimos oficiales d'Asturies, mientres que yá dende l'añu 2005 fala de "renovar progresivamente la rotulación toponímica de víes y carreteres" y tamién la de los planos oficiales. Un conveniu cola alministración del estáu pa qu'emplegue tamién estos topónimos nes sos estayes de competencia forma parte tamién de les midíes a tomar

L'área cuarta del plan encárgase de los medios de comunicación, siendo la mayor novedá qu'enxerta la de "Promover l'usu de la llingua asturiana y de la fala del occidente d'Asturies, nel Ente Públicu de Comunicación del Principáu d'Asturies" una midida que va facese d'alcuerdu col ente públicu, anque'l plan nun entra a concretar plazos, usu preferencial del idioma en determinaos programes o porcentaxes d'emisión.

La quinta estaya del plan, entitulada "promoción y sensibilización social" enancha l'ámbitu d'actuación de les actuales campañes de promoción, apautando midíes específiques empobinaes a l'usu del asturianu en marques de calidá, sobremanera nel sector agroalimentariu, nel ámbitu social del deporte o na hostelería.

P'acabar, la sexta parte del plan incluye una riestra de midíes ente les que s'incluye la convocatoria de subvenciones pa toles estayes de la producción cultural dende la lliteratura hasta les audiovisuales y tamién delles midíes más novedoses como la creación del "Premiu de les Lletres Asturianes" de periodicidá bianual y la realización d'una gran esposición itinerante sobre la llingua asturiana pal añu 2006
Ver equí'l testu enteru del plan en formatu PDF