Asturies.com pasa de les 60.000 visites

Nel veranu del añu 2000, Asturies.com, que yá llevaba funcionando como selmanariu dende 1996, convirtiose en diariu y enxertose nel control d'audiencia d'OJD, la que lleva'l control de difusión de los mayores periódicos y medios de comunicación nel estáu. El primer informe d'OJD (Oficina de Justificación de la Difusión) naquel añu 2.000 dexó a Asturies.com raspiando les 25.000 visites al mes, un bon datu col que naide nun contaba y que dexaba bien afitaes les posibilidaes d'un mediu en llingua asturiana pa salir alantre. Agora, dos años depués, l'informe de la OJD del mes de setiembre de 2002 apurre un total de 61.190 visites a Asturies.com, amás de 237.258 páxines descargaes, lo que quier dicir que tolos díes entren por términu mediu nel web 2100 internautes que lleen cuatro páxines distintes.

Ye la primer vegada qu'Asturies.com pasa de les 60.000 visites nun mes, y estes 60.000 visites suponen que l'audiencia d'Asturies.com triplicose nun plazu de dos años, lo que diz muncho tanto de la difusión del mediu como de la fidelidá de los nuestros llectores, a los que queremos dende equí agradecé-yos la so collaboración pa qu'un mediu de comunicación n'asturianu siga, depués de seyes años, ente los más vistos d'Asturies.