Asturies.com fai 25 años como mediu de comunicación en llingua asturiana

  En febreru del 1997 echaba a andar Asturia baxo’l dominiu www.asturies.com, que poco más alantre daría’l nome a esti mediu de comunicación en llingua asturiana que cumple agora 25 años contando l’actualidá dende una visión asturiana. Encaramos con esti festexu un 2022 que va venir con munches novedaes.

Colos saludos del presidente del país, Adrián Barbón; del nuesu Parllamentu, Marcelino Marcos; de la conseyera encargada de la Política Llingüística, Berta Piñán; y de la institución encargada de velar pol idioma, Xosé Antón González Riaño, arrancamos esti aniversariu tan especial nel que rescampla’l nuesu logu conmemorativu. 25 años de vida qu’entamaron mirando hacia’l futuru nun mediu, la rede Internet, entovía inesploráu, agora presente en toles estayes de la nuesa vida diaria.

Un cuartu de sieglu que queremos aprovechar pa dar un reblagu, consolidanos como un referente nel periodismu nacional y llegar a más asturianes y asturianos. Asina, a lo llargo del añu vamos dir anunciando  novedaes, ente les que va tar un diseñu más modernu pa la web pa igualanos a les meyores cabeceres dixitales.

Tái sollertes y acompañáinos nesta celebración que van ser la base pa otros 25 años d’información del país y del mundu n’asturianu y con una visión asturiana.