Asturies.com estrena una nueva canal pa los sos llectores

Dende esta selmana, los llectores d'Asturies.com cuenten con una nueva canal pa potenciar la so comunicación d'esti mediu, decanu de la prensa dixital n'asturianu na rede dende 1997. Amás de la tradicional dirección de corréu de la nuestra redacción, dende agora, rellenando esti formulariu que va tar disponible na portada del diariu, los llectores vais poder facer llegar cualquier suxerencia pa meyorar los nuestros conteníos, lo mesmo que vais poder collaborar con Asturies.com comentando les iniciatives en que participáis o los esmolecimientos que tenéis por daqué tema y que vos prestaría qu'apaecieren nesti diariu.

Dende fechos d'interés qu'asocedan nel vuestru ámbitu hasta convocatories culturales o d'otru tipu coles que tengáis rellación, too pue tener un güecu nesti mediu. Dende Asturies.com abrímosvos un estragal nuevu pel que facer llegar la información a un públicu de miles de llectores que tán naguando poles vuestres informaciones.

Ye importante sorrayar que nun ye obligatorio que s' unvie la información yá redactao, nin tampoco ye preciso saber escribir correctamente n'asturianu. El nuestru equipu de redacción encargaráse de da-yos forma a aquellos escritos o comunicaos que tengan falta d'ello.