Asturies.com estrena Divina Lluz de Mus

Dende güei ufiertamos a los nuesos llectores la posibilidá de descargar n'esclusiva un cantar del nuevu discu de "Mus", que lleva'l nome de "Divina Lluz" y que va tar nes tiendes dende mañana llunes.

"Divina Lluz" ye'l tercer discu de llarga duración de los xixoneses "Mus", dempués de "Fai" y "El Naval". Muncho cambiaron les coses pal grupu dende que yá va siete años sacaren el so primer trabayu discográficu, un EP entituláu "Zuna". Agora'l dúu yá tien un sitiu fecho na escena de la música independiente del estáu, amás d'algamar el reconocimientu de les más de les publicaciones especializaes. Preba d'esto ye qu'esti "Divina Lluz" espublízase a la vez n'España, Estaos Uníos y Taiwán. Precisamente per esti país pa la pareya asturiana, acompaños pola so banda, van facer una xira pa presentar esti nuevu discu el mes qu'entra.

Pue dicíse que ye un discu colos pies na tierra, sobre too pola temática de los cantares. Son temes cercanos xeográficamente, importantes nes sos consecuencies y de preocupaciones espardíes universalmente, emigración n'Asturies, desaparición de los barrios obreros, la muerte al traviés de los güeyos d'un neñu, o como nel casu del cantar que pueden baxar los nuesos llectores, la desaparición de la minería del carbón al traviés del recuerdu d'un accidente na mina. Esti cantar ye "Dexame Pasar", y pa descargalu en formatu mp3 namás qu'hai que calcar equí.

Nel planu musical, Fran Gayo y Mónica Vacas sigue fieles a la sencillez y sinceridá del so apuesta musical. La voz de Mónica mormuria les lletres lo que da un toque que calez tol discu, acompañada por una música seliquina, directa, que va al pasu podríamos dicir, pero con momentos de fuercia, que de sópitu, cambien el ritmu mental del qu'escucha'l discu. El discu tien amás la collaboración especial del caderalgu en filosofía y históricu lluchador llibertariu José Luis García Rúa que recita "Adiós", un poema dedicáu a les imáxenes que-y quedaron cuando tuvo que colar d'Asturies exiliáu.

P'acabar dar les gracies al dúu "Mus" y a la so discográfica "Acuarela" por prestanos esti tema pa los nuesos llectores, recordar que pa descargalu namás hai que dir a esta dirección.