Asturies ye’l territoriu qu’algama la meyor nota en satisfaición ente los turistes de fuera del Estáu

|

Asturies, con un 9,4 sobre 10, ye’l territoriu con una meyor nota en satisfaición ente los turistes encuestaos pol Institutu d’Estudios Turísticos (IET) del Ministeriu d'Industria. Navarra (9,1) y Extremadura (9) son les siguientes na llista.
 
L’informe Habitur 2010 recueye qu’ente los aspectos que más contribuyeron a aumentar el grau de satisfaición de los turistes de fuera del Estáu n’Asturies sitúense la belleza paisaxística del entornu del destín, la confortabilidá de les habitaciones del agospiu, la ufierta culinaria, el tratu y l’atención recibida, el conocimientu d’idiomes, la seguridá del entornu y la relación calidá-preciu. Les notes más baxes foron p’Andalucía y Madrid, con un 8,3.
 
Amás de tener la meyor calificación en satisfaición, el nuesu país tamién encabeza la llista del entornu turísticu, con 8,8 sobre 10. Mentes, en gastronomía, Asturies tien que conformase cola segunda plaza, igualada con Extremadura y Navarra, tamién con un 8,8. El territorio que más-yos prestó nesti apartáu a los visitantes foi La Rioja, con un 9,2. Nel apartáu d’ociu, les Illes Balears rexistraron la meyor calificación, con un 8,1; Cantabria n’agospios, con un 8,3; y Extremadura y Navarra n’ifraestructures, con un 8,4.

Contador Estadistiques