Asturies ye’l territoriu del Estáu que pierde más población

El númberu total de persones empadronaes n’Asturies baxó un 0,3 por cientu, lo que convierte al nuesu país nel territoriu del Estáu que perdió más población en términos relativos nel 2010. Nel conxuntu del Estáu, medró nun 0,3 por cientu.
 
El total de residentes n'Asturies a 1 de xineru del 2011 ye de 1.081.348 habitantes, según l'avance del padrón municipal que publica l'Instituto Nacional de Estadística (INE), lo que supón perder 2.993 empadronaos. En términos absolutos, el nuesu país ye’l terceru en pérdida de población tres Castiella-Lleón (3.773) y Galicia (3.137). Nel lláu contrariu tán Andalucía (44.515), Catalunya (22.870) y la Comunidad de Madrid (22.830), mentes qu’en terminos relativos les mayores xubíes de población produzse nes ciudaes autónomes de Melilla (3,2 por cientu) y Ceuta (2,0 por cientu), asina como en Castilla-La Mancha y Comunidá Foral de Navarra, con un aumentu del 0,7 por cientu. No que respeuta al Estáu, la población empadronada aumentó un 0,3 por cientu nel añu últimu hasta los 47.150.819 ciudadanos, de los que 5,7 millones, el 12,2 por cientu del total, tienen nacionalidá estranxera.
 
Asturies tamién ta nos primeros puestos de la llista de territorios con un menor porcentaxe d’estranxeros, con un 4,7 por cientu, tres Galicia (3,9 por cientu) y Extremadura (3,7 por cientu). Por contra, Illes Balears (21,8 por cientu), Comunitat Valenciana (17,2 por cientu), Madrid y Murcia (les dos con un 16,4 por cientu) son les comunidaes onde más xente de fuera del Estáu reside.