Asturies y Cuadonga lideren una llista d'ayalgues europees escondíes

La empresa Mastercard ta acabante d’ellaborar una llista coles 44 "ayalgues europees escondíes" basándose na opinión d’espertos en turismu y blogueros. La primera de la llista ye Asturies, destacando a Cuadonga, a la que-y siguen les malteses Mdina y Zebbug.

A la hora d’afitar el llistáu túvose en cuenta la belleza, la poca masificación o’l costu de comer y dormir. Asina, d’Asturies destácase los sos numberosos atractivos nun especiu pequeñu, “con sableres increíbles y poco masificaes, d’agua cristalina; posibilidá de facer escursionismu pa tolos niveles en plena naturaleza; ciudaes bulliciegues; cocina de calidá; y elementos culturales destacaos”.

Nel dossier presentáu, destacáse sobre manera la basílica de Cuadonga, señalándola como entrada al Parque Nacional de los Picos de Europa. Por último, empondera qu’Asturies ye un destín desconocíu y asequible, “con agospios sobre los 25 euros y un costu pa comer d’unos 18 euros”.