Asturies yá cuenta con un mapa oficial cola toponimia revisada

El mapa oficial d’Asturies, del añu 1989, yá pasó a la historia. La Conseyería de Cultura y Turismu presentó esti martes un mapa nuevu cola toponimia revisada, esto ye, colos nomes tradicionales de 49 conceyos del país.
 
El direutor xeneral d'Ordenación del Territoriu y Urbanismu, Guillermo Morales, presentó'l nuevu documentu acompañáu pola directora xeneral de Política Llingüística, Consuelo Vega, nun actu nel que tamién se presentaron los decretos de toponimia de nueve conceyos: Avilés, Ponga, Quirós, Ribeseya, Samartín d'Ozcos, Santalla d'Ozcos, Taramundi, Teberga y Vilanova d'Ozcos. D’esti mapa nuevu van sacase 4.000 exemplares que van distribuyise a conceyos, instituciones y particulares qu'asina lo deseen.
 
Vega señaló que los nestos momentos los conceyos tán trabayando na revisión vial de los indicadores de topónimos, y que’l Gobiernu estatal ta incluyendo los nuevos nomes nes sos bases de datos y na ellaboración del Nomenclátor Xeográficu del Estáu, ellaboráu pol Ministeriu de Fomentu y el Instituto Geográfico Nacional. Tamién recordó'l llabor de la Direición Xeneral de la Carreteres na aplicación sistemática y progresiva de la toponimia tradicional.
 
Pela so parte, Morales destacó la riqueza n'información “xeográfica y toponímica” d'esti mapa, realizáu a una escala de 1:200.000. qu’inclúi una llista detallada de topónimos, orónimos, talasónimos y hidrónimos. El direutor xeneral tamién puntualizó que, gracies a los avances informático, el mapa pue actualizase de manera permanente.
 
Otra manera, según informó la responsable de Política Llingüística, nestos momentos, ta trabayándose na revisión toponímica d'Ayande, Bual Caravia, Castropol, Ibias, Illas, Llanera, Salas, Santu Adrianu, Somiedu, Tapia, Tinéu, Uviéu y Valdés. Queden por principiar los trámites en Cabrales, Candamu, Eilao, Cuaña, Cuideiru, Muros, Navia, Onís, Peñamellera Alta, Peñamellera Baxa, Les Regueres, Pravia, Villayón, Sotu'l Barcu y Santiso d'Abres.