Asturies vive una xornada de fuelga contra la reforma llaboral del PP

|

Los sindicatos convoquen pa esti xueves una xornada de fuelga pa protestar contra la reforma llaboral que quier imponer el PP. Los minoritarios van manifestase en Xixón pela mañana, mentes que los mayoritarios van facelo pela tarde n’Uviéu.
 
L’Humedal va ser, al meudía, el puntu de partida de la manifestación convocada por CSI, SUATEA y CGT, mentes que CC OO, UXT y USO van marchar peles cais d’Uviéu. Ésta va salir, a les 18.30 hores de la plaza d’América. Espérase una participación masiva nes dos protestes, anque munchos trabayadores vienen denunciando estos díes presiones por parte de delles empreses pa que nun exerzan el so derechu a la fuelga, llegando inclusive a amenzar con despidos.
 
La intención de los sindicatos ye, según esplicó Antonio Pino, secretariu xenera de Comisiones Obreres nel país (CC OO), salir a la cai "pa dici-y a Rajoy: asina non", y fixo un llamamientu a los trabayadores pa qu’eviten les confrontaciones a lo llargo de la marcha uviedina y na xornada de fuelga. Pino criticó una reforma llaboral que "abarata el despidu y fraya’l consensu constitucional”, mentes que Francisco Baragaño, el so homólogu na Unión Sindical Obrera (USO), llamó a la movilización “por decencia” pa “honrar a los vieyos lluchadores; polos mozos, polos paraos y por toos, porque nun hai seutor que nun tea afectáu”.

Contador Estadistiques