Asturies vive un descensu na asistencia a espectáculos

Los espectáculos desarrollaos n’Asturies, en toles sos variantes culturales, viven un descensu nel númberu d’asistentes. Según datos del 2010 asoleyaos pol Institutu Asturianu d’Estadística, el teatru ye’l que más acusa la baxada.
 
Asina, el númberu d’espectadores d’obres de teatru menguó nel país un 26,27 por cientu nel 2010, cuando se rexistraron 291.911 asistentes, frente a los 395.926 del añu anterior. Mentes, el públicu de los conciertos de música popular disminuyó nun 6,86 por cientu, pasando de 1,06 millones d’espectadores nel 2009 a 986.427. Tamién decreció l’asistencia a los espectáculos de música clásica (2,17 por cientu).
 
Los datos espublizaos pol Institutu Asturianu d’Estadística (IAE) sobre cultura, deporte y tiempu llibre, no que respeuta a les representaciones llíriques, reflexen un descensu de públicu del 10,56 por cientu, yá que se pasó de los 68.969 espectadores del 2009 a los 61.684 del 2010. Na mesma llinia, les representaciones de danza tuvieron un 3,93 por ciento menos d’asistencia: de 21.593 se pasó a 20.744.
 
El cine nun se llibra
 
El númberu de sesiones de cine menguó un 5,83 por cientu, mentes que la baxada nel númberu d’espectadores situóse nun 11,79 por cientu al rexistrar un 1,6 millones. Los llargometraxes procedentes d’Estaos Xuníos resultaron poco perxudicaos, con un descensu d’asistencia del 1,65 por ciento, acaparando a un 71,3 por cientu del públicu asturianu. Mentes, los de sellu estatal sumaron un 10,9 por cientu del total, por un 15,5 del añu anterior.
 
Les películes d’otres procedencias medraron en númberu d’espectadores casi un 50 por cientu, pasando del 11,9 por cientu de públicu asturianu nel 2009 al 17,8 al añu siguiente.