Asturies vive la segunda fuelga xeneral del añu contra les polítiques del Gobiernu del PP

Esti miércoles, 14 de payares, los asturianos y asturianes tán llamaos polos sindicatos a facer fuelga xeneral contra les polítiques del Gobiernu del PP y en defensa del Estáu del bienestar. Xixón y Uviéu van acoyer les manifestaciones.

Al meudía ta convocada una marcha polos sindicatos CSI, CGT, CNT y SUATEA con salida na xixonesa plaza L’Humedal y final n’El Naútico. Mentes, pela tarde n’Uviéu, va tener llugar la manifestación de los mayoritarios, CC OO, UXT y USO. Ésta va partir a les 18 hores de la plaza d’América.

Na mañana del martes, la Corriente Sindical d’Izquierda (CSI) denunció nun comunicáu un intentu de los sindicatos mayoritoria d’arrampuñar la convocatoria de la manifestación xixonesa. Según esplica, Comisiones Obreres (CC OO) convidó’l xueves pasáu a representantes de la CSI a un aconceyamientu pa intentar una movilización conxunta, que se celebró’l llunes. Nél nun tuvo llugar alderique nengún y CC OO anunciaba que convocaren una manifestación pal día de la fuelga en Xixón, a la mesma hora y col mesmu percorríu, y demandó a la CSI que sofitara esa marcha. Pese a too, los sindicatos minoritarios caltienen la convocatoria.

Ésta ye la segunda fuelga que vive’l país nesti 2012. La primera celebróse’l 29 de marzu contra la reforma llaboral del PP y tuvo un siguimientu de cerca del 90 por cientu n’Asturies, cifra que s’esperar superar esti miércoles. Compromisu por Asturies y les formaciones Andecha Astur y Conceyu Abiertu sofiten esta xornada de fuelga, que tamién se celebra nel restu del Estáu y Portugal. Mentes, hai convocaos paros parciales n’Italia, Grecia, Xipre y Malta, y concentraciones de solidaridá en delles ciudaes europees.