Asturies va tener que devolver "ente 500 y 600 millones"

|

El conseyeru d'Economía y Facienda, Jaime Rabanal, señaló que la so previsión ye qu'Asturies tenga que devolver "ente 500 y 600 millones" poles entregues a cuenta del sistema de financiación nel exerciciu 2009.

El conseyeru d'Economía y Facienda, Jaime Rabanal, señaló que la so previsión ye qu'Asturies tenga que devolver "ente 500 y 600 millones" poles entregues a cuenta del sistema de financiación nel exerciciu 2009.

Una cantidá a la que se va tener que facer frente a partir del 2012, nun plazu de cinco años. La cantidá total que van tener que desarrollar les comunidaes autónomes por eses entregues a cuenta n'España va ser d'unos 20.000 millones.
  
Rabanal fizo estes manifestaciones na Comisión d'Economía y Facienda de la Xunta Xeneral, onde compareció a propuesta del PP pa informar sobre cuestiones rellacionaes col actual modelu de financiación autonómicu.
  
El sistema dispón que les comunidaes autónomes reciben dineru adelantáu per parte del Estáu, correspondiente a la so participación nos impuestos. El problema surdió cuando la recaudación baxa al respecto de lo previsto y, poro, les comunidaes tienen que devolver la diferencia.
  
Eso yá asocedió cola lliquidación del 2008, exerciciu del que yá se conocen cifres concretes. Asina, Asturies tien que devolver 171,2 millones que se van compensar en cinco exercicios, a partir del añu que vien, a razón d'unos 34 millones por añu. "Con otru modelu de financiación, tendría que devolvese too nun añu", señaló'l conseyeru.
 
Cantidá enforma mayor
Rabanal prevé que la lliquidación del 2009 va obligar al Gobiernu asturianu a devolver una cantidá enforma mayor, a falta de que se zarren los datos, fundamentalmente los relativos al IRPF, de forma que la cantidá a devolver correspondiente a esi exerciciu va asitiase ente los 500 y 600 millones.
  
Nesti sen, el dirixente asturianu esplicó que son delles les comunidaes autónomes que s'alcontraron con esti problema, polo que solicitaron al Ministeriu d'Economía alguna fórmula p'amenorgar lo que pue suponer la devolución, dende un mayor plazu hasta la posibilidá d'empeñase sin incumplir l'actual oxetivu del déficit. Esi pidimientu "nun s'atendió hasta la fecha".
  
Y ye que, según esplicó Rabanal, les entregues a cuenta que realizó l'Estáu a les comunidaes autónomes determináronse partiendo de datos del 2006, periodu nel que la crisis nun ficiere actu de presencia. Ésa ye la razón del desfase nes lliquidaciones mentaes.
  
Sicasí, dixo que nun prevé que na lliquidación correspondiente al 2010 vaya a haber nengún problema porque'l Gobiernu central fixó les sos previsiones a "la realidá". Asina, el conseyeru d'Economía considera que tres la lliquidación del 2010, Asturies nun sólo nun va tener que devolver nada, sinón que va poder recibir, al ser la lliquidación previsiblemente "lixeramente positiva".
  
Respuestes parlamentaries
La diputada del PP, Alejandra Cuétara, valoró a Rabanal el so "actu de valentía" al ofrecer esa cifra, porque ye tovía superior que la que'l PP esperaba. Cuétara señaló que son unos 700 millones la cantidá que va tener que devolver el Asturies poles cantidaes a cuenta del 2008 y 2009. Too ye consecuencia, según Cuétara, de la mala previsión de los socialistes. "A ustedes convenía-yos creer les previsiones falses que mos tuvieron vendiendo, y agora tenemos que facer frente a lo que se gasta cuando nun había dineru", díxo-y a Rabanal.
  
El voceru d'IX-BA-Verdes, Jesús Iglesias, esplicó que'l problema ye "importante", y que requier una solución global", puesto que son munches les comunidaes autónomes que tán afectaes. "El Gobiernu nacional tendría qu'asumir la so propia responsabilidá y buscar soluciones y alternatives", dixo.
  
A lo último, el diputáu del PSOE, Álvaro Álvarez, esplicó qu'existió una "mala previsión" per parte de los Presupuestos Xenerales del Estáu (PXE), llendando asina la responsabilidá nesti asuntu del Gobiernu rexonal. "Valoróse de manera poco acertada l'algame de la situación de crisis", manifestó.
 

Contador Estadistiques