Asturies va tener la población más avieyao del estáu nel 2030

La Oficina Europea d'Estadística fexo ayeri públiques les sos perspectives de población pa España. L'informe conseña pal estáu español una población de 45,3 millones d'habitantes nel 2030 y de los que más de 11 millones van ser mayores de 65 años, una tasa d'avieyamientu poblacional que va liderar Asturies, qu'amás va ser de les poques autonomíes españoles que pierdan habitantes, conseñando un escenariu de baxada demográfica hasta la raya de los 900.000 habitantes nel finxu del 2030.

L'actual dinámica poblacional española, con una perda de población nes comunidaes del norte y un tirón demográficu protagonizáu poles del sur y la costa mediterránea, va marcase más, acordies coles previsiones del organismu européu, que prende l'alarma sobre los índices de dependencia de la tercera edá. Esti índiz, que vien de la rellación ente la población de más 65 años y la que tien ente15 y los 64, va disparase m'Asturies hasta valores del 55,8%, los más altos del estáu, que va tener pa entós una media de dependencia del 38,9% contra'l 24,6% que se rexistró nel 2004.

Tocante a otros estaos miembros de la UE, l'informe albidra una baxada de población grande pa los países del este, casu de Polonia, Rumanía, Bulgaria o la República Checa, mientres que los países de la Europa occidental van caltener les sos poblaciones actuales. El problema del avieyamientu de la población va afectar sobremanera a países como Alemania, Italia o Finlandia.