Asturies va ser la primera en recibir hidróxenu verde del mayor proyeutu esistente a escala mundial

ArcelorMittal, Grupo Fertiberia, Enagás y DH2 Energy impulsen HyDeal España, “l’espaciu d’entamamientu d’hidróxenu renovable y competitivo integrao más grande del mundu”. El so primer proyeutu va abastecer a Asturies a un preciu competitivu respueto a combustibles fósiles pa la producción d’aceru o amoniacu.

HyDeal España ye la primer implementación industrial de la plataforma HyDeal Ambition, el mayor gran proyeutu d’hidróxenu renovable a escala mundial, según la clasificación fecha pública pola International Renewable Energy Agency (IRENA), nel que participen 30 compañíes de toa Europa como Falck Renewables, Vinci Construction, Hydrogène de France, Gazel Energie, McPhy Energy o Snam, ente otres. Constituyida como proyeutu conxuntu industrial en payares y agora, depués d’un estudiu de previabilidá, da pasu al desendolcu, financiación y construcción d’un conxuntu d’infraestructures pa la producción y tresporte d’hidróxenu verde nel Estáu.

La primer etapa del proyeutu, anunciáu güei, va permitir abastecer a un importante complexu industrial asturianu “produciendo l’hidróxenu renovable per aciu d’electrólisis y a un preciu competitivu respeuto a otros combustibles fósiles gracies a plantas solares allugaes en distintos puntos de la metá norte d’España”, espliquen los sos participantes. La producción principiará nel 2025 y los beneficiaos nesti entamu son la siderúrxica ArcelorMittal y la planta d’amoniacu verde que va llevantar Fertiberia n’Avilés p’ampliar les sos instalaciones.

Asina, estes dos empreses serán les dos primeres grandes compradores “d’esta enerxía limpia”, con un plan p’alquirir 6,6 millones de tonelaes d’hidróxenu renovable nos 20 años próximos, “lo que supondría torgar el 4 por cientu de les emisiones actuales de CO2 d’España”. José Manuel Arias, presidente d’ArcelorMittal, afirmó que “HyDeal España ye una allianza estratéxica p’ArcelorMittal, que nos dará accesu al volume d’hidróxeno verde necesario pa progresar na nuesa fueya de ruta hacia la descarbonización na producción d’aceru”.

“Basándonos nel hidróxenu verde competitivo d’HyDeal España, invertiremos nuna planta nueva d’amoniaco verde d’última xeneración y altamente flexible pa cubrir les necesidaes de la nuesa fábrica de fertilizantes d’Avilés”, anunció Javier Goñi, direutor executivu del Grupo Fertiberia. Con esta apuesta pola economía verde fecha poles cuatro firmes qu’impulsen l’espaciu d’entamamientu d’hidróxenu renovable, éstes pretenden posicionase como líderes europees nos sos respeutivos mercaos.

Na imaxe, instalaciones de Xixón d'ArcelorMittal. Semeya obra de Carlos Gutiérrez (Copyright ArcelorMittal).