Asturies va recibir del Estáu un 39’8% menos d’inversión

El proyectu de Llei de los Presupuestos Xenerales del Estáu (PXE) pal 2011 contempla una inversión total p'Asturies de 556 millones d'euros, lo que supón un descensu del 39,8 por cientu sobre'l presente exerciciu.

Según señaló esti xueves el Delegáu del Gobiernu n'Asturies, Antonio Trevín, trátase de los "presupuestos más austeros na historia de la democracia".  Toles comunidaes autónomes, dixo, van siguir recibiendo importantes inversiones nel 2011. "Nun podemos pretender qu'Asturies seya una esceición", comentó.
 
En tou casu, destacó que la inversión por habitante na comunidá autónoma ye la segunda del Estáu, con 513 euros, un 44% penriba de la media nacional, que ye de 356 euros y namás superada pola de Castiella y Lleón, que sube a los 687 euros, algo que Trevín atribuyó a la importante inversión n'alta velocidá pa esa comunidá, algo que tamién va beneficiar a Asturies, puesto que ta incluyida la llinia Madrid-Xixón.
  
No que se refier a Asturies, el pesu de la inversión supón un 3,3 por cientu sobre'l total estatal, porcentaxe superior al pesu de la comunidá nel Productu Interior Públicu, que ye del 2,2 por cientu.
  
La principal partida n'inversión destínase precisamente a l'alta velocidá, con 131,7 millones, lo que supón la recepción de la totalidá de la inversión de la variante de Payares, según Trevín. Tamién destaquen los 95 millones d'euros que van pal Puertu d'El Musel, en Xixón, de los que 53,6 millones son pa l'ampliación del mesmu.
  
Los PXE asignen n'Asturies 76,7 millones a l'Autopista del Cantábricu (A-8). En concreto, pal tramu Pendueles-Unquera tán contemplaos 27 millones, 21 pal Llanes-Pendueles y 14 pa Variante de Navia-Tapia.
  
El capítulu de carreteres tamién asigna 13,3 millones a diverses actuaciones na autopista Uviéu -La Espina, de los que 6,6 millones son pal tramu Cornellana-Salas. Mientres, na N-634 el tramu Outur-Villapedre cuenta con 11,8 millones, y l'enllaz de l'A-64 cola Autovía Minera (SI-1) en Pola de Siero tien 9 millones. A lo último, pa viabilidá, rehabilitación y meyores, según p'actuaciones de seguridá vial tán contemplaos 25,6 millones.
  
El Plan de Seguridá d'Asturies de FEVE tien asignáu 25 millones d'euros, mientres que'l Puertu d'Avilés tien 17 millones, de los que 15 son pal desarrollu de la marxe derecha de la ría. Pal Aeropuertu d'Asturies apaecen conseñaos 6,4 millones, de los que cuatro son pa l'ampliación de la zona de recoyida d'equipaxes.
  
La llista de partíes más importantes complétase colos 9 millones pal 'Plan Picos' d'actuaciones de saniamientu, los ocho millones pa l'ampliación y escabezamientu del colector norte d'Uviéu, los 7,8 pa la Estación Depuradora d'Agües Residuales (EDAR) de Les Caldes, los 4,9 millones p'actuaciones na mariña y 1,6 millones pa la rehabilitación integral del muséu arqueolóxicu d'Uviéu.
  
Amás, inclúise la redacción de los estudios d'integración del ferrocarril d'Avilés, y se contituarán los estudios informativos de la rede d'Alta Velocidá n'Asturies (La Pola L.lena-Uviéu-Xixón). Tamién y contempla la meyora de la rede d'infraestructures de FEVE, pa la puesta en serviciu de los ramales de tresporte de mercancíes a ENCE y Puertu de Xixón y la electrificación del tramu Les Arriondes-Ribesella-Llanes.
  
En xunto, les inversiones del Estáu n'infraestructures de tresporte n'Asturies va ser de 448 millones, de los que 190,4 son pa inversiones ferroviaries, 138,5 millones pa carreteres, 112,5 millones pa puertos y 6,4 millones p'aeropuertos.
  
La inversiones hidráulica y medioambiental del Estáu n'Asturies van subir a 57,2 millones, incluyendo trés millones de tresferencies de capital pa inversión.
  
Trevín dixo que, a pesar de  la reducción d'inversión nos PXE de 2011, Asturies recordó que'l Principáu recibió una "importante inversión adicional", al traviés de los dos fondos creaos pol Gobiernu pa contribuyir al caltenimientu de l'actividá económica y l'empléu. Nel 2009 fueron 190,2 millones, mientres que nel 2010 fueron 116, 8 millones.
 
Gastu social  
El Delegáu del Gobiernu calcó en qu'una de les prioridaes pal Gobiernu ye'l caltenimientu del gastu social "a pesar de les dificultaes". D'esta manera, dixo que los PXE contemplen 444 millones pa les pensiones mínimes, cantidá que supón un 1,3% más que l'añu pasáu y que va beneficiar a 55.400 persones.
  
Pa beques n'Asturies van destinase 25 millones, un 8% más que  nel  2010, afectando a 28.500 beneficiarios. Pa polítiques de familia nel Principáu presupuestáronse 1,8 millones, mientres que se caltién el presupuestu de la Renta Básica d'Emancipación.