Asturies va recibir 46 millones de fondos europeos pa vivienda

Un total de 33,7 millones van destinase a rehabilitación enerxética d'edificios y 12,1 a ampliar el parque públicu d'alquiler.

El Conseyu de Ministros autorizó güei la distribución territorial y los criterios de repartu de 1.889 millones procedentes de los fondos europeos de recuperación, de los que 1.389 podrán trespasase esti añu a les comunidaes y ciudaes autónomas pa financiar la rehabilitación y rexeneración de viviendes, barrios y edificios residenciales. Los 500 millones restantes tresferiránse a partir del 2023 pa llevantar viviendes d'alquiler social.

Asturies va recibir esti añu 33.738.810 euros destinaos a la rehabilitación enerxética d'edificios al traviés de comunidaes de propietarios y a actuaciones a nivel de barriu, y l'añu qu'entra otros 12.145.000 p'ampliar el parque públicu de vivienda d'alquiler. Les convocatories pa presentar solicitúes abriránse a lo último d'esti añu o nel primer trimestre del 2023, yá que'l repartu territorial aprobáu pol Conseyu de Gobiernu ha abordarse na Conferencia Sectorial de Vivienda y Suelu, que va ser la qu'autorice les tresferencies de creitu.

Con estes midíes búscase reducir un 30 por cientu'l consumu d'enerxía primaria non renovable de los llares y ameyorar el confort y l'habitabilidá per aciu d'actuaciones como'l cambiu de ventanes, la espansión de la calefacción alimentada con enerxíes renovables o la renovación de sistemes de calefacción y d'esfrecimientu obsoletos.