Asturies va formar parte del Conseyu Xeneral de la Emigración

El Director Xeneral d'Emigración, Jesús Copa Novo, comprometióse a ello col Conseyeru de Xusticia, Seguridá Publica y Rellaciones Exteriores, Francisco Javier García Valledor nuna xunta que tuvieron dambos cargos en Madrid. Dende la Conseyería destacóse que con ello consíguese un oxetivu históricu de la nuestra comunidá autónoma. Asturies foi hasta agora "miembru observador" d'esti organismu, que ye la entidá consultiva más importante del Estáu en materia d'emigración

Amás de la entrada de fechu d'Asturies nel Conseyu d'emigración, que va producise n'asamblea d'esti organismu prevista pa la selmana qu'entra ( díes 13 al 15), Valledor y Copa Novo trataron de la redacción del Estatutu del Emigrante, norma xurídica pola qu'han mandase los derechos de los españoles na emigración. Valledor comprometióse a qu'Asturies participe nel procesu de redacción d'esti documentu aportando los conocimientos de l'aministración asturiana nel tema y les suxerencies de los mesmos emigrantes asturianos. Nestisentíu Valledor sorrayó que yera preciso axuntar y coordinar esfuerzos ente alministraciones autonómiques y l'Estáu proponiendo la creación d'una Conferencia Sectorial de la Emigración cola participación de les distintes alministraciones autonómiques y del Gobiernu

La recuperación del derechu a la nacionalidá española de los nietos de emigrantes españoles foi ún de los temes más polémicos que se trataron. Valledor defendió esti derechu, que diz que yá tan mirando d'adoptar otros estaos europeos colos sos emigrantes. El Director Xeneral esplicó-y al representante asturianu que ye una posibilidá que ta estudiándose y que'l Ministeriu de Trabayu y la Seguridá Social tan tratando'l tema pa llevalu,en cuantes seya posible, a Conseyu de Ministros. Les protestes de los emigrantes pola mala programación de la Canal Internacional de Televisión Española foron ún de los temes menores que se trataron na reunión, na que Valledor dio-y a conocer a Copa Novo los conteníos del Plan d'emigración asturianu, rescamplando les coincidencies d'esti col borrador del Estatutu del Emigrante.