Asturies va contar con un “recuerdu permanente” pa les víctimes de la COVID-19

El Gobiernu estatal decretó esti martes el periodu de llutu oficial más llargu de la historia de la Democracia. Dende esti miércoles, y per diez díes, les banderes de tolos edificios públicos van ondular a media asta con un llazu prietu en memoria de les víctimes de la COVID-19, que van contar n’Asturies con “un recuerdu permanente”.

El país acumula, a falta de conocer los datos oficiales d’ayeri, 310 muertos pola enfermedá causada pol coronavirus SARS-Cov2, a los qu’hai que sumar al rodiu de 27.000 nel restu del Estáu y más de 300.000 nel mundu. “Queremos trabayar pa dexar un recuerdu permanente polos finaos d’esta pandemia que dientro de cien años los entós asturianos y asturianes recordarán, y pondrán en valor el sentimientu de tou un pueblu, el sentimientu conxuntu d’una humanidá, que se vio énte la so propia debilidá, que se reconoció nesa propia debilidá y que, entá asina, tuvo que salir alantre”, apuntó Adrián Barbón nun actu nes escaleres de Presidencia nel que tuvo acompañáu pol presidente de la Xunta Xeneral, Marcelino Marcos; la Delegada del Gobiernu estatal n’Asturies, Delia Losa; l’alcalde Alfredo Canteli; la presidenta de la Federación Asturiana de Conceyos, Cecilia Pérez Sánchez; y representantes de tolos grupos parllamentarios.

“Ye necesario qu’estos diez díes de llutu oficial nos sirvan sobre manera pa tresmitir esi ciñu polos finaos y tamién pa recordar al restu de ciudadanos y ciudadanes d’Asturies que ye importante nun baxar la guardia, que’l coronavirus ye un asesín silenciosu que se contaxa de manera fácil y que, por desgracia, mata”, añadió’l presidente. “El mio pesar sinceru en nome d’Asturies polos finaos. L’afeutu más sinceru a los familiares y amistaes de les persones que perdimos”, finó enantes de dar pasu a cinco emotivos minutos de silenciu n’homenaxe a les víctimes.

Semeya obra d'Armando Álvarez.