Asturies va baillar esta fin de selmana con Talco y La Tarrancha

|

Con permisu de les actuaciones de la Folixa na Primavera, los conciertos de Talco y La Tarrancha van protagonizar la fin de selmana musical n’Asturies. Los italianos toquen esti vienres en Xixón y los asturianos, el sábadu en Cualloto.
 
El sellu autoxestionáu Xunca Records entama esta nueche, a partir de les 22 hores na sala Acapulco de Xixón, un conciertu de los italianos Talco xunto colos italocatalanes La Mâquina. D’esta forma, la banda de ska, que yá visitara’l nuesu país en delles ocasiones, torna a Asturies un añu depués. Una perbona opción pa disfrutar d’un conciertu baillable y reivindicativu a un preciu de 12 euros.
 
Los que quieran siguir ximielgándose, el sábadu tienen la posibilidá d’acudir a l’actuación que La Tarrancha tien prevista pa la medianueche nel Tierra Astur de Cualloto. El grupu de mecigayu ska va ufrir nesti conciertu dellos cantares nuevos, temes del discu 'Ö-3-3' y otras canciones vieyes remocicaes. La entrada al Tierra Astur de Cualloto va ser de baldre.
 
Otra manera, esta fin de selmana ye la despedida del Savoy Drinks&Music, bar que nos cinco años últimos foi una referencia n’Asturies como sala de conciertos. Pel escenariu del Savoy van pasar esti vienres y el sábadu –ayeri yá hubo delles actuaciones– una seleición de les meyores bandes que tocaren nesti llocal que yá ye parte de la historia musical de Xixón. Asina, pa güei van tocar alredor de 30 minutos bandes como Blues&Decker, Capitán Cavernícola, Tierra de Nadie o Mystereo; y mañana, otres como Javi&Los Paramétricos, Los Vólidos, Los Ministros o Tuscany Valley Experience.
 
Mentes, el Teatru Filarmónica va acoyer el domingu a les 11.45 hores una edición nueva del ‘Concursu de Folclor Ciudá d’Uviéu’, que yá ta na so fase final.

Contador Estadistiques