Asturies tuvo En Mauthausen

El Conseyeru de Rellaciones Esteriores, Francisco Javier García Valledor y el Director de l'Axencia Asturiana de Cooperación al Desarrollu Rafael Palacios asistieron ayeri xunto colos miembros d'una delegación asturiana formada por representantes del Atenéu Obreru de Xixón y familiares de los republicanos asturianos presos nel Campu, a los actos oficiales del LX aniversariu de la lliberación del Campu de Concentración de Mauthausen, onde nos años de la II Guerra Mundial alcontraron la muerte a manes del terror nazi más de 7.000 republicanos españoles, de los que cerca de 100 yeren asturianos.

Nestos actos oficiales nos que participaron más de 30.000 persones, tuvo tamién el Presidente del Gobiernu español, José Luis Rodríguez Zapatero y representaciones institucionales internacionales. Énte'l monumentu a los republicanos españoles muertos y presos nel Campu de Concentración de Mauthausen intervinieron el Presidente Zapatero, el Conseyeru Valledor, el Presidente del Atenéu Obreru de Xixón, Luis Pascual, representantes de los Gobiernos catalán y andaluz y miembros de delles organizaciones, ente elles l'Asociación de los Herederos de los Republicanos Españoles Residentes n'Austria, representaos por Silvia Cueto, fía de Víctor Cueto, quien tuvo deportau cuatro años en Mauthausen.

Como yera d'esperar, nos actos hebo momentos emotivos, sobremanera nel desfile conxuntu que ficieron toles delegaciones peles instalaciones del campu y especialmente al pasar perbaxo la puerta d'entrada al campu, onde los guardies-yos dicíen a los presos que la única llibertá que diben alcontrar diba ser la de salir pela chimenea. L'abondante representación del Estáu español recibió a lo llargo de tol recorríu muestres d'apreciu y solidaridá, y no que cinca a la delegación asturiana, esta tuvo un alcuentru mui emocionante col asturianu d'Uxo David Moyano, que tuvo deportau cuatro años nel Campu de Concentración de Mauthausen y col Brigadista austríacu Hans Landauer, tamién deportau en Campu de Concentración de Dachau y que güei ye ún de los responsables del Archivu de la Resistencia Austriaca. La xornada acabó con un alcuentru con fíos y familiares de republicanos españoles que tuvieron presos en Campu de Concentración de Mauthausen, ente ellos dellos asturianos.

L'avanzada edá de los supervivientes de los campos de concentración fai qu'esti pueda ser ún de los últimos cabudaños de Mauthausen nos que los antiguos presos tean presentes. En faltando ellos, los campos de concentración nazis van dexar de ser alcordanza pa ser historia, y, polo que toca a Asturies, yá cásique nun queden supervivientes asturianos del campu de Mauthausen dempués de la desapaición nos últimos meses de Galo Ramos, Manuel Cortés y Avelino Fernández. Amás del llabor que ta faciendo l'Atenéu Obreru de Xixón pa que les nueves xeneraciones sepan de lo qu'asocedió, Angelita Andrade, fía d'un de los asturianos muertos nes cámares de gas de Mauthausen, lleva la representación n'Asturies de l'asociación "Amical Mauthausen" que caltién viva l'alcordanza d'aquel terrible socesu históricu del que se cumplen agora sesenta años.