Asturies torna a tar presente nel Festival de la Máscara Ibérica

Los Sidros de Valdesoto, Os reises de Tormaleo y Os reises del Valledor van representar a Asturies nel Festival de la Máscara Ibérica de Zamora esta fin de selmana. Tamién ta convidáu Skama la Rede, que va dar un conciertu’l sábadu.
 
Un total de 350 persones mazcaraes de cerca de venti grupos de tola Península Ibérica van participar nesta folixa que llena de color y diversión a Zamora per trés díes. “Ye un puntu d’alcuentru pa les mazcaraes ibériques y la única oportunidá de presenciar a mazcaraes d’Extremadura, Portugal, Galicia, Castilla y Lleón y Asturies xuntes”, destaca Pablo Canal Rodríguez, miembru de L’Asociación pa la Recuperación de Los Sidros y Les Comedies ‘El Cencerru’. L’actividá va principiar el vienres cola apertura de la ‘Muestra de las regiones’ na Plaza Mayor, onde hasta’l domingu, n’horariu de 11 a 20 hores, los zamoranos y visitantes van poder disfrutar d’artesanía, de gastronomía típica de toles zones participantes nel festival y muncha animación. Yá pela tarde, a les 21 hores, ta prevista l’actuación de los cacereños Cerandeo, grupu folk que bebe de la tradición musical estremeña y portuguesa.
 
El sábadu va vivise’l día grande del certame cola celebración, a partir de les 12 hores, del III Desfile de la Máscara Ibérica, nel que van tomar parte Los Sidros de Valdesoto (Siero), Os reises de Tormaleo (Ibias) y Os Reises del Valledor (Ayande). Nél, per dos hores, tolos participantes van percorrer les cais de Zamora, dende’l parque de la Marina hasta la Plaza Mayor, nun espectáculu qu’enllena de coloríu la ciudá. Yá pela nueche, la folixa va continuar coles actuaciones na Plaza Mayor del grupu de folk alternativu portugués Rakia (21 hores) y de Skama la Rede (22.30 hores). Mentes, na mañana del domingu, ta prevista la participación de la Banda del Grupu Principáu de Llugones nun pasucais pel centru de Zamora.
 
Rede de la Mázcara Ibérica
 
De forma paralela a la celebración del festival, va tener llugar el sábadu, a les 18 hores nel Hotel AC Zamora, la tercera xunta de la Rede de la Mázcara Ibérica, na que tien confirmada la so presencia les ediles de Cultura de los conceyos de Siero y Ibias –ta pendiente de confirmación el desplazamientu a Zamora de dalgún representante d’Ayande–. Nel aconceyamientu ta previsto l’aprobación de los estatutos de la Rede pa, asina, echar a andar esta plataforma que pretende reforciar les rellaciones ente les mazcaraes de tola península y poner en común los sos problemes, amás de lluchar dende ella pa qu’haya un compromisu por parte de les instituciones pa protexer estes fiestes. Ente les previsiones de la Rede, ta la petición futura a la UNESCO pa declara a les mazcaraes ibériques como Patrimoniu Inmaterial de la Humanidá.
 
Na semeya, Los Sidros na so participación nes IV Mazcaraes d'Iviernu de Valdesoto esti mesmu añu.